Հնագույն տաճարի վրա կախված լիալուսնի տակ Հայաստանի կամերային նվագախումբը հինգշաբթի երեկոյան հանդես եկավ գալա-համերգով: Դա «Հայաստան. ծառատունկ» ծրագրի 10-ամյակին նվիրված առաջին համերգն էր: Երկրորդը կկայանա այսօր երեկոյան:

Գառնի` հրաշալի երաժշտություն և հիասքանչ բնություն

Մաեստրո Արամ Ղարաբեկյանի նշանով նվագախումբը սկսեց նվագել երեկոյան ժամը 10-ին: Կատարվեց «Վարդագույն աղջիկների պարը» Արամ Խաչատրյանի «Գայանե» բալետից, իսկ այդ պահին լուսինն իր շողերը սփռեց մ.թ.ա. 1-ին դարում կառուցված հեթանոսական տաճարի վրա:

Տաճարի ներսը ողողված էր դեղին լույսով, իսկ սյունաշարքն ու ճակատը` մանուշակագույն: Նման ներկայացում առաջին անգամ է բեմադրվում Գառնիում` Հայաստանում զբոսաշրջիկների ամենասիրած տեսարժան վայրերից մեկում:

Նստելատեղեր էին ապահովված մոտ 600 հանդիսականի համար, ևս 100-ը ոտքի վրա էր ըմբոշխնում համերգը: Հանդիսականների մեջ կային գառնեցիներ, երևանցիներ և սփյուռքահայեր:

«Սա իմ տեսած ամենաարտասովոր համերգն էր,- ասաց 45-ամյա գառնեցի Հեղինե Զուրաբյանը: - Շատ կուզենայի, որ երեխաներս նման համերգներ լսելու հնարավորություն ավելի հաճախ ունենային»:

Նվագախմբի հետ երգում է սոպրանո Գայանե Գրիգորյանը

Համերգին մասնակցեցին երգչուհիներ Գայանե Գրիգորյանը և Նունե Բադալյանը (երկուսն էլ սոպրանո), որոնք արժանացան հոտնկայս ծափահարություն-ների «Անուշ» օպերայի եզրափակիչ դերերգի կատարման համար:

Համերգին նախորդած իր բացման խոսքում Ղարաբեկյանը դրվատանքով խոսեց «Հայաստան. ծառատունկ» ծրագրի մասին: Այս տասնամյակի ընթացքում ծրագրի շնորհիվ Հայաստանի 500 վայրերում տնկվել է շուրջ 530 հազար ծառ:

«Պարզապես ցնցող էր երաժշտություն վայելել այս զարմանահրաշ տաճարի առջև,- ասաց Բոստոնից ժամանած Գլեն Սուրաբյանը, որն աշխատում է Միացյալ Նահանգների միջազգային զարգացման գործակալության ծրագրերից մեկում: - Այդ զարմանահրաշ ծառերը պարզապես բռնկվեցին: Սա «Ծառատունկ» ծրագրի հրաշալի տոնակատարություն էր»:

Մաեստրո Ղարաբեկյանը

Նվագախումբը նման համերգով անցյալ տարի հանդես էր եկել Շուշիում:

Նվագախմբի տնօրեն Արմեն Արաբյանի հավաստմամբ` Գառնիի համերգի կազմակերպումը չափազանց դժվար գործ էր, ավելի դժվար, քան ղարաբաղյան համերգը: Ներկայացման վրա ծախսվել է մոտ 20 հազար դոլար: Նվագախումբը հուսով է, որ նման համերգները կդառնան ամենամյա:

Ներկայացումը նկարահանվել է և կթողարկվի թվային տեսասկավառակի վրա: Այն կձայնագրվի նաև կոմպակտ սկավառակի վրա:

Հայաստանի հանրային հեռուստատեսությունը նախատեսում է ուղիղ եթեր հեռարձակել ուրբաթ օրվա համերգը: