²ÝóÛ³É ³Ù³éí³ Ñ³çáÕ Íñ³·ÇñÁ Ý»ñßÝã»ó ÓÙ»é³ÛÇÝ §´³½»Ç¦ ·³Õ³÷³ñÁ

Անցյալ տարվա ամառային հավաքի հաջողությունից հետո և Հայաստանի նախագահի առաջարկությամբ հաջորդ շաբաթ 350 երիտասարդներ կժամանեն Ծաղկաձոր՝ մասնակցելու «Բազե. ձմեռ» մարզամշակութային հավաքին:

«Ձմեռային «Բազե» ըստ էության նախատեսված չէր, այն կյանքի կոչվեց այն պահից, երբ «Բազե 2003»-ի փակման արարողության ժամանակ հանրապետության նախագահը միտք արտահայտեց. «Իսկ ինչու՞ չանել ձմեռային «Բազե»», ասում է Համահայկական երիտասարդական հիմնադրամի լրատվության բաժնի պետ Աստղիկ Ավետիսյանը:

Փետրվարի 2-9-ը Հայաստանի բոլոր մարզերը ներկայացնող 300 և սփյուռքահայ 50 երիտասարդներ կբաժանվեն թիմերի՝ կարմիր, կապույտ ու նարնջագույն, և կմասնակցեն մինի-ֆուտբոլի, վոլեյբոլի, սեղանի թենիսի, շախմատի և դահուկավազքի մրցումներին:

Մարզերում մասնակիցներն ընտրվում են տեղի մշակույթի, կրթության և երիտասարդության հարցերի վարչությունների կողմից: Երևանում ընտրությունը կատարում են բուհերի ուսանողական խորհուրդները: Սփյուռքահայ մասնակիցներին ընտրում են հայկական դեսպանությունները համապատասխան երկրներում: Այս անգամ սփյուռքահայ մասնակիցներ են սպասվում ԱՄՆ-ից, Սիրիայից, Լիբանանից, Իրանից, ՈՒկրաինայից և Վրաստանից:

Բացի մարզական միջոցառումներից կանցկացվեն նաև Հայաստանում քաղաքացիական կարևորություն ունեցող հարցերի քննարկմանը նվիրված կլոր սեղաններ, ինչպես նաև հանդիպումներ քաղաքական գործիչների և նախարարների հետ:

Նախատեսվում են նաև երգ ու պարի, նորաձևության մրցույթներ: Առաջադրանքների թվում է նաև «Սառցե քաղաքի» կառուցումը: Ընդ որում, Ավետիսյանի հավաստմամբ, մասնակիցները կարող են օգտվել միայն բահերից և վարսահարդարիչներից:

«Բազեն» հիմնադրվել է 1998 թվականին և համագործակցում է ուսանողական բոլոր կազմակերպությունների, պետական տարբեր գերատեսչությունների ու երիտասարդական ՀԿ-ների հետ: Այն իրականացնում է երկու տեսակի ծրագրեր՝ տեղական և համահայկական: Առաջին «Բազե»-ին մասնակցում էին երիտասարդներ Հայաստանի տարբեր մարզերից, ինչպես նաև Ջավախքից ու Արցախից: Անցյալ տարվանից «Բազեն» դարձել է համահայկական, և հավաքներին սկսել են մասնակցել երիտասարդներ աշխարհի տարբեր երկրների հայկական համայնքներից: