ArmeniaNow.com - Independent Journalism From Today's Armenia
February 27, 2004




Վայրագ մարդասպանություն. սպայի սպանությունը ՆԱՏՕ-ի խաղաղության ծրագրում առաջ է բերում հասարակության զայրույթը

Լեյտենանտ Գուրգեն Մարգարյանին կացնահարել է ադրբեջանցի զինվորականը

Հայ սպայի սպանությունը ՆԱՏՕ-ի «Գործընկերություն հանուն խաղաղության» ծրագրի դասընթացներում ադրբեջանցի զինվորականի կողմից մեծացրել է լարվածությունը երկու երկրների միջև:

Փետրվարի 19-ի վաղ առավոտյան 26-ամյա լեյտենանտ Գուրգեն Մարգարյանը կացնահարվել է քնած վիճակում: Սպանության մեղադրանքով կալանվել է ադրբեջանցի սպա Ռամիլ Սաֆարովը:

Հայաստանի պաշտպանության նախարարությունը կատարվածը դատապարտել է որպես «դաժանությամբ նախադեպը չունեցող վայրագ սպանություն»:

Ադրբեջանի արտգործնախարարությունը «ափսոսանք է» հայտնել միջադեպի կապակցությամբ, սակայն հայտարարել է, թե հայ զինվորականը հրահրել է 27-ամյա Սաֆարովին:

Երկու զինվորականները մասնակցում էին Հունգարիայի մայրաքաղաք Բուդապեշտում ՆԱՏՕ-ի ծրագրով անցկացվող անգլերեն լեզվի դասընթացներին: Մարգարյանը գտնվում էր Բուդապեշտում հունվարի 6-ից:

Բուդապեշտի ոստիկանությունը նկարագրել է դեպքը որպես «արտասովոր դաժանությամբ կատարված սպանություն»: Ոստիկանության մայոր Վալտեր Ֆուլոփն ասել է. «Բացի կրծքի շրջանում դանակի բազմաթիվ հարվածների հետքերից, զոհի գլուխը փաստորեն հատված էր մարմնից»:

Ոստիկանությունը հայտնել է, որ ադրբեջանցի սպան մտել է Մարգարյանի սենյակը, երբ վերջինս քնած է եղել, և կացնի հարվածով սպանել նրան:

Մարգարյանի հունգարացի սենյակակիցը տագնապ է բարձրացրել և զանգահարել է ոստիկանություն, որի հավաստմամբ ձերբակալության պահին Սաֆարովը դիմադրություն ցույց չի տվել:

Բուդապեշտի քննիչները հրաժարվել են մեկնաբանել հանցագործության դրդապատճառները, սակայն երկուշաբթի օրը հունգարական ոստիկանությունը հայտնել է, որ ադրբեջանցի սպան նախապատրաստել է ոճրագործությունը մեկ ամսվա ընթացքում: Նրանք հերքել են Սաֆարովի և Մարգարյանի միջև կոնֆլիկտի վարկածը:

Գուրգեն Մարգարյանը Երևանի բնակիչ էր: Ավարտել է Երևանի ճարտարագիտական համալսարանը: Մասնագիտությամբ ինժեներ-տնտեսագետ էր: 1999-2001 թվականներին ծառայել է Հայաստանի ազգային բանակում, ապա զինվորական ծառայությունը շարունակել է ՊՆ թիկունքի վարչությունում: Ընկերների բնութագրմամբ զուսպ էր և հավասարակշիռ:

Հինգշաբթի օրը Գուրգեն Մարգարյանի աճյունը բերվեց Երևան: Հայ սպայի դին օդանավակայանում դիմավորեցին Հայաստանի Զինված ուժերի բարձրագույն սպայակազմի ներկայացուցիչները: Օդանավակայանում էին նաև սպանված զինվորականի հարազատներն ու քաղաքացիներ, որոնք պարզել էին «Արժանի պատիժ ազերի ոճրագործի'ն», «Ո'չ սպանդին, եղեռնին» պաստառները:

Գուրգեն Մարգարյանի հուղարկավորությունը տեղի կունենա փետրվարի 28-ին Եռաբլուրում:

Հայաստանի պաշտպանության նախարարությունը «կատարված վայրագ սպանությունը գնահատում է որպես վերջին շրջանում Ադրբեջանի ռազմատենչ քարոզչության ակտիվացման և թշնամանքի սերմանման քաղաքականության անմիջական հետևանք» և հույս է հայտնում, որ «միջազգային հանրությունը համապատասխան եզրակացություն կանի»:

Ըստ ՊՆ հայտարարության դասընթացներին մասնակցող երկրորդ հայ սպան փրկվել է նույն ճակատագրից իր լիտվացի սենյակակցի միջամտության շնորհիվ:

Հայաստանի արտաքին գործերի նախարարությունն իր խորը զայրույթն է արտահայտել՝ Հունգարիայի իշխանություններից պահանջելով ոճրագործին պատժել օրենքի ամբողջ խստությամբ:

«Այս հանցագործությունը տրամաբանական հետևանքն է Ադրբեջանի իշխանությունների կողմից տարիներ ի վեր սանձազերծված հակահայկական հիստերիայի և վերջին ամիսների ռազմատենչ քարոզչության, որով հետևողականորեն վարակվում է ադրբեջանական ողջ հանրությունը», ասված է Հայաստանի ԱԳՆ հայտարարության մեջ:

ՆԱՏՕ-ն դատապարտել է սպանությունը և հույս է հայտնել, որ «ողբերգական միջադեպը» չի անդրադառնա ՆԱՏՕ-ի հետ Հայաստանի համագործակցության վրա:

«Դա հստակորեն քրեական հանցագործություն է, որը մենք, անշուշտ, խստորեն դատապարտում ենք: Մեր ցավակցությունն ենք հայտնում զոհվածի ընտանիքին: Մեր մտքերը ներկա պահին նրա ընտանիքի հետ են», հայտնել է ՆԱՏՕ-ի ներկայացուցիչ Ռոբերտ Պշչելը:

«Հայաստանը ծրագրի ակտիվ մասնակիցներից է: Մենք հուսով ենք և կոչ ենք անում Հայաստանին շարունակելու այդ մասնակցությունը»:

Ադրբեջանի արտգործնախարարությունը նույնպես ցավակցություն է հայտնել՝ միևնույն ժամանակ հայտարարելով, որ Մարգարյանը «շարունակաբար վիրավորել է Սաֆարովի արժանապատվությունը՝ որպես ադրբեջանցի սպայի և քաղաքացու»:

Ադրբեջանի ՊՆ խոսնակ Ռամիզ Մելիքովը Ադրբեջանի պետական հեռուստատեսությամբ հայտնել է, որ ադրբեջանցի սպան եղել է Ջեբրայիլի շրջանի բնակիչ, նրա հարազատները սպանվել են ղարաբաղյան պատերազմի տարիներին, ինչը կարող էր բացասաբար անդրադառնալ ադրբեջանցի սպայի հոգեբանության վրա:

«Մինչև դատարանի որոշումը ոչ ոք իրավունք չունի ադրբեջանցի սպային անվանելու մարդասպան: Դեռևս պարզ չէ, թե ով է սպանել հայ սպային», հայտարարել է Մելիքովը:

Ադրբեջանական «Զերկալո» և «Էխո» թերթերն այս կապակցությամբ հրապարակած իրենց հոդվածները վերնագրել են «Ո՞վ է սպանել հայ սպային Բուդապեշտում» և «Հայ սպայի սպանության մեջ կասկածվում է ադրբեջանցի զինվորականը»:

Սաֆարովն ավարտել է Բաքվի զինվորական ուսումնարանը և Թուրքիայի ցամաքային զորքերի բարձրագույն դպրոցը: Ըստ ադրբեջանական «Էխո» թերթի Բուդապեշտի դասընթացներին մասնակցող երկրորդ ադրբեջանցի սպան դեպքից մեկ օր հետո վերադարձել է Ադրբեջան:

Եվրոպայի խորհրդում Ադրբեջանի ներկայացուցիչ Ակշին Մեհտիևն ավելի ռազմատենչ դիրքորոշում է որդեգրել: Նա խորհուրդ է տվել հայերին չքնել այնքան ժամանակ, քանի դեռ ԼՂՀ-ի հարցը օրակարգում է. «Մինչև ԼՂՀ-ի հակամարտությունը չկարգավորվի, չի կարելի լիովին բացառել բուդապեշտյան միջադեպի կրկնությունը»:

Ոմանք Ադրբեջանում արդեն Սաֆարովին հերոս են հայտարարում: Ադրբեջանի Ղարաբաղի ազատագրություն կազմակերպությունը ստեղծել է Ռամիլ Սաֆարովի պաշտպանության կոմիտե, որին միացել են Ադրբեջանի մի շարք հասարակական և քաղաքական գործիչներ:

Ադրբեջանական «Զերկալո» թերթը գրում է. «Կազմակերպության մի անդամ կոչ է արել ժողովրդին բոլոր նորածին տղաներին անվանել Ռամիլ անունով: Սա մեր բարոյական աջակցությունը կլինի հայրենիքից»:

Հայաստանի իշխանությունները միջադեպը կապում են աշնանը Ադրբեջանում կայանալիք «Գործընկերություն հանուն խաղաղության» ծրագրի շրջանակներում «Լավագույն համատեղ ջանք-2004» զորավարժություններին հայ զինվորականների մասնակցությանը պաշտոնական Բաքվի մերժողական դիրքի հետ: Անցյալ ամիս ՊՆ պատվիրակությունը չկարողացավ մասնակցել Բաքվում կայացած նախնական պլանավորման կոնֆերանսին:

ՆԱՏՕ-ում Հայաստանի պատվիրակության ղեկավար Վիգեն Չիտեչյանը Բրյուսելում հանդիպել է ՆԱՏՕ-ի գլխավոր քարտուղար Յաապ դո Հոոպ Սխեֆերի հետ և նրան է փոխանցել Վարդան Օսկանյանի նամակը: Գլխավոր քարտուղարն իր ցավակցությունն է հայտնել Մարգարյանի ընտանիքին:

Եվրոպայի հայերի համագումարը խստորեն դատապարտել է սպանությունը Բուդապեշտում. «Ադրբեջանցի սպայի այս բարբարոս գործողությունը ևս մեկ արյունալի ապացույց է այն իրողության, որ հայ ժողովուրդը չի կարող անվտանգ գոյատևել Ադրբեջանի իշխանության ներքո»:

Երիտասարդական կազմակերպությունները նույնպես իրենց զայրույթն են արտահայտել՝ բողոքի երթ կազմակերպելով դեպի արտգործնախարարություն, որտեղ սպանությունը դատապարտող նամակ են հանձնել Եվրոպայի խորհրդի խորհրդարանական վեհաժողովի Ղարաբաղի հարցով զեկուցող Թերի Դևիսին:

Միքայել Հարությունյանն ասում է, որ պարտություն կկրի այն կողմը, որը կսկսի պատերազմը

«Իմ տպավորությամբ բանակցությունները շարունակելով հանդերձ Ադրբեջանն, այնուամենյանիվ, նախապատրաստվում է պատերազմի», ասում է Ազգային ժողովրդական միության առաջնորդ և նախկին վարչապետ Վազգեն Մանուկյանը:

Անդրադառնալով Մարգարյանի սպանությանը՝ նա նշում է. «Ես չեմ բացառում, որ դա Ադրբեջանում սկսված հակահայկական հիստերիայի արդյունք է: Իսկ հիստերիան սկսվում է պատերազմի նախապատրաստվելուց առաջ»:

Ըստ պաշտպանության փոխնախարար Միքայել Հարությունյանի Ադրբեջանի զինված ուժերում տիրող իրավիճակը հիմք չի տալիս ասելու, որ Ադրբեջանը պատրաստվում է պատերազմի:

«Ես համոզված եմ, որ ով առաջինը սկսի այդ պատերազմը, նա էլ կպարտվի: Իսկ մենք չենք պատրաստվում սկսել այդ պատերազմը», հայտարարել է Հարությունյանը:


According to Agnes
 

  Inside
 

History at Risk: Khachkars of Julfa suffer renewed destruction

Full story

 
 

Sweating on Screen: Healthy living show offers competitors fame through fitness

Full story

 
 


 


The Week in seven days

 
 


The Arts in seven days

 

  Photo of the week
  Click here to enlarge.
Click on the photo above to enlarge.
 
 
 
 

Armenian Officer's Body in Yerevan

Thursday, the body of Lieutenant Gurgen Margaryan killed by Azeri officer in Budapest last week was brought to Armenia in a closed coffin. Margaryan will be burried Saturday at Yerablur, cemetery of Karabakh war veterans.

 

 





Copyright ArmeniaNow.com 2002-2024. All rights reserved.

The contents of this website cannot be copied, either wholly or partially, reproduced, transferred, loaded, published or distributed in any way without the prior written consent of ArmeniaNow.com.