Հայաստան - Ղազախստան. չնայած 11-մետրանոցներով, բայց միևնույն է՝ հաղթանակ

Հայաստանի հավաքականը 0-2 հաշվով զիջեց Հունգարիայի հավաքականին Կիպրոսի ֆուտբոլի ֆեդերացիայի ութերորդ միջազգային մրցաշարի իր անդրանիկ խաղում:

Պաֆոս քաղաքի «Պաֆիակոս» մարզադաշտում կայացած խաղի առաջին կեսում գոլեր չգրանցվեցին, սակայն երկրորդ խաղակեսի 64-րդ րոպեին Իմրե Շաբիչը բացեց խաղի հաշիվը, իսկ խաղավարտից քառորդ ժամ առաջ Կրիստիան Լիստեշը խփեց երկրորդ գոլը:

Բացի Հունգարիայի և Հայաստանի հավաքականներից մրցաշարին մասնակցում են նաև Կիպրոսի, Լատվիայի, Բելառուսի, Ռումինիայի, Վրաստանի և Ղազախստանի հավաքականները: Խաղերն անցնում են կղզու հինգ քաղաքներում՝ Ախնաս, Լարնակա, Լիմասոլ, Նիկոսիա և Պաֆոս:

Առաջին տուրում Եվրո-2004-ի եզրափակիչ դուրս եկած Լատվիայի հավաքականը 3-1 հաշվով հաղթեց Ղազախստանին: Ռումինիան 3-0 հաշվով առավելության հասավ Վրաստանի նկատմամբ, ընդ որում երկու գոլի հեղինակ դարձավ Ադրիան Մուտուն «Չելսիից»: Կիպրոսը զիջեց Բելառուսին՝ 0-2:

Երեկ Հայաստանի հավաքականը հանդիպեց Ղազախստանի հավաքականի հետ: Խաղի հիմնական ժամանակն ավարտվեց ոչ-ոքի՝ 3-3: Հայաստանի թիմից գոլերը խփեցին Գալուստ Պետրոսյանը (52-րդ րոպեին) և Արտավազդ Քարամյանը՝ (73-րդ և 80-րդ րոպեներին): 11-մետրանոց հարվածներով հաղթեց Հայաստանի հավաքականը՝ 3-2, և փետրվարի 21-ին կմրցի Կիպրոսի հավաքականի հետ 5-րդ տեղի համար:

Մյուս արդյունքները. Ռումինիա-Բելառուս՝ 2-0, Կիպրոս-Վրաստան՝ 3-1, Հունգարիա-Լատվիա՝ 2-1: Փետրվարի 21-ին եզրափակիչ խաղում կհանդիպեն Ռումինիան և Հունգարիան: Նույն օրը Բելառուսը կխաղա Լատվիայի հետ 3-րդ տեղի համար, իսկ Վրաստանը և Ղազախստանը կպայքարեն 7-րդ տեղի համար: