ArmeniaNow.com - Independent Journalism From Today's Armenia
February 20, 2004




Սրտային հարցեր. ամուսնական պայմանագրերը մուտք են գործում Հայաստան նոր «Ընտանեկան օրենսգրքով»

 

Եթե դուք 16 տարեկան աղջիկ եք և որոշել եք ամուսնանալ (ինչը հազվադեպ երևույթ չէ մեր օրերում), ապա ստիպված եք առնվազն ևս մեկ տարի սպասել՝ Հայաստանի նոր օրենքը չխախտելու և ամուսնությունն օրինա կանորեն գրանցելու համար:

Կառավարության առաջարկած նոր ընտանեկան օրենսգիրքը, որն ուղղված է ամուսնական օրենսդրության արդիականացմանը, կքաջալերի ապագա նորապսակներին կարգավորել ոչ միայն նրանց ռոմանտիկ համատեղ կյանքը, այլ նաև ֆինանսական հարաբերությունները:

«Նոր օրենսդրական նախագծի մշակումը չափազանց կարևոր էր, քանի որ ամուսնության և ընտանիքի նախորդ օրենսգիրքն ընդունվել էր 1970-ականներին և հնացել էր», ասում է Ազգային ժողովի պետաիրավական հարցերի մշտական հանձնաժողովի գլխավոր մասնագետ Աստղիկ Մատինյանը:

«Հաշվի առնելով ժամանակի պահանջը և մյուս երկրների փորձը տվյալ բնագավառում՝ նոր ընտանեկան օրենսգիրքը ներառում է մի շարք դրույթներ ամուսնական պայմանագրի, պարտավորությունների և այլ հարցերի մասին, որոնք նախկինում անգամ չէին շոշափվում»:

Թեև նոր օրենսգիրքը դեռ չի ընդգրկվել Ազգային ժողովի կողմից քննարկվելիք նախագծերի մեջ, սակայն արդեն առաջ է բերել ոչ միայն իրավաբանների, այլև շարքային քաղաքացիների հետաքրքրությունը: Օրենսգրքի առանձին դրույթներ արդեն հասցրել են բազմաթիվ հեռուստաբանավեճերի ու քննարկումների թեմա դառնալ:

Նոր օրենսգիրքն անդրադառնում է ամուսնությունների, ամուսնալուծությունների, գույքի բաժանման, երեխաների անվանափոխության, ամուսնական պայմանագրերի և այլ հարցերի, որոնք կարող են նոր մակարդակի վրա բարձրացնել մարդու իրավունքների պաշտպանությունը:

«Օրենսգիրքը շատ բան կփոխի՝ սկսած ընտանեկան պայմանագրերից մինչև գույքի բաժանումն ու իրավունքների պաշտպանությունը, - ասում է արդարադատության նախարարության մամուլի խոսնակ Արա Սաղաթելյանը: - Նոր օրենքով ամեն ինչ կլինի նորովի»:

Շատ նորապսակներ չեն ցանկանում մտածել ամուսնալուծության մասին հարսանիքից առաջ

Նոր օրենսգրքում ամրագրված է նաև ամուսնության պայմանագիր հասկացությունը, որով ապագա ամուսինները սահմանում են իրենց պարտավորություններն ու իրավունքները: Երևանի ամուսնական գրասենյակների աշխատակիցները հույս են հայտնում, որ նոր ամուսնական պայմանագրի շնորհիվ կպակասի ամուսնալուծության հետ կապված քաշքշուկը:

«Գույքի բաժանման պայմանագիրը Հայաստանում գոյություն ունի արդեն երեք տարի, սակայն ընդամենը մեկ ընտանիք է օգտվել դրանից, - ասում են նրանք: - Շատ դեպքերում, երբ խոսք է լինում ամուսնական պայմանագրերի մասին, շատերը նեղանում ու ասում են, որ ամուսնանում են երջանիկ լինելու համար, և մտադիր չեն հենց սկզբից մտածել ամուսնալուծության մասին: Սակայն երբ հետո գործը հասնում է ամուսնալուծությանը, տղամարդիկ շատ մանրախնդիր են դառնում, և կինն ու երեխան շատ դեպքերում հայտնվում են փողոցում: Այս պարագայում նոր օրենսգիրքն իսկական փրկություն կարող է դառնալ»:

Բացի ընտանեկան գույքի ու պարտավորությունների մասին պայմանագրերից, օրենսգիրքը նաև հետաքրքիր դրույթներ է պարունակում ամուսնացողների առողջության վերաբերյալ, ինչը նորություն է Հայաստանում:

Օրենսգրքի 19-րդ հոդվածը պարունակում է հետևյալ դրույթը. «Եթե ամուսնացած անձը մյուս ամուսնուց թաքցրել է ամուսնության գրանցման պահին իր մոտ վեներական հիվանդության կամ մարդու իմունային անբավարարության վիրուսի, հոգեկան հիվանդության կամ թմրամոլության առկայության փաստը, ապա մյուս ամուսինն իրավունք ունի դիմելու դատարան ամուսնությունն անվավեր ճանաչելու համար»:

«Շատերն ամուսնանում են՝ անտեղյակ լինելով իրենց զուգընկերոջ առողջական խնդիրներին, ինչը կարող է հանգեցնել բազմաթիվ պրոբլեմների և նույնիսկ՝ ամուսնալուծություն, - ասում է առողջապահության նախարարի խորհրդական Ռուսլանա Գևորգյանը: - Այնպես որ նախօրոք իմանալը՝ արդյոք իրենք կարող են երեխա ունենալ, կան արդյոք վարակիչ հիվանդություններ, ավելի լավ է, քան անտեղյակությունը»:

Առողջապահության նախարարության մոր և մանկան պահպանության վարչության պետ Կարինե Սարիբեկյանի հավաստմամբ նոր օրենքը հնարավորություն կընձեռի զույգերին մինչ ամուսնությունը բուժստուգում անցնելու, ինչը կնպաստի առողջ ամուսնություններին:

«Մարդիկ պետք է հարգեն միմյանց իրավունքները և կարողանան պաշտպանել իրենց, և այդ հարցում նրանց կօգնի օրենսգրքի ընդունումը, - ասում է Կարինե Սարիբեկյանը: - Այնպես որ նախնական բուժստուգումը, որը, ի դեպ, անվճար կլինի անապահով խավերի համար, շատ կարևոր է: Այն լուծում կտա բազմաթիվ հարցերի, որոնց մենք շատ հաճախ բախվում ենք որպես մոր և մանկան պաշտպաններ»:


According to Agnes
 

  Inside
 

Matters of the Heart: The “prenup” comes to Armenia in new code on the family

Full story

 
 

Medical Malpractice: Writers' Union accuses district government of stealing its hospital

Full story

 
 

 


The Week in seven days

 
 


The Arts in seven days

 

  Photo of the week
 
Click on the photo above to enlarge.
 
 
 
 

Ombudsman Appointed

Ombudsmanship proves to be women's job in South Caucasus. Larisa Alaverdyan, Armenia's first ombudsman, was appointed by President Kocharyan, Thursday, February 19. Armenia is the third country of the region to appoint a woman for this position of human rights protector.

 

 





Copyright ArmeniaNow.com 2002-2024. All rights reserved.

The contents of this website cannot be copied, either wholly or partially, reproduced, transferred, loaded, published or distributed in any way without the prior written consent of ArmeniaNow.com.