ArmeniaNow.com - Independent Journalism From Today's Armenia
February 20, 2004




Վստահության չափը. ընդդիմությունը մեծացնում է ճնշումը` պահանջելով քննարկել Քոչարյանին վստահության հանրաքվեի դրույթը

Երեք շաբաթ դատարկ են ընդդիմության
տեղերը Ազգային ժողովում

«Արդարություն» և «Ազգային միաբանություն» ընդդիմադիր խմբակցությունների պատգամավորներն արդեն երրորդ շաբաթն է բոյկոտում են խորհրդարանի աշխատանքները` փորձելով օրակարգի մեջ մտցնել նախագահ Քոչարյանին վստահության հանրաքվե անցկացնելու մասին օրենքը:

Քսանհինգ պատգամավորներ պնդում են, որ չեն վերադառնա խորհրդարան, մինչև իշխող մեծամասնությունը չհաստատի, որ պատրաստ է բանավեճ սկսելու հանրաքվեի մասին օրենքի ընդունման մասին:

Փետրվարի 2-ին խորհրդարանական մեծամասնությունը դեմ քվեարկեց «Հանրաքվեի մասին» օրենքում փոփոխություն առաջարկող օրինագիծն օրակարգում ընդգրկելուն:

Քվեարկությունից առաջ «Արդարություն» և «Ազգային միաբանություն» խմբակցությունների պատգամավորները լքեցին նիստերի դահլիճը: Հաջորդ օրն այդ երկու խմբակցությունները հանդես եկան խորհրդարանի աշխատանքները բոյկոտելու մասին համատեղ հայտարարությամբ:

«Նախագահական խայտառակ ընտրություններից հետո Սահմանադրական դատարանը 2003 թ. ապրիլի 16-ին ընդունեց որոշում՝ առաջարկելով նորընտիր ԱԺ-ին և հանրապետության նախագահին «Հանրաքվեի մասին» ՀՀ օրենքը համապատասխանեցնել Սահմանադրությանը և մեկ տարվա ընթացքում անցկացնել վստահության հանրաքվե: Սակայն չընտրված նախագահը և իշխանական կոալիցիան ոչինչ չձեռնարկեցին այդ որոշումը իրագործելու համար», ասված է հայտարարության մեջ:

«Արդարություն» խմբակցության քարտուղար Վիկտոր Դալլաքյանը մեղադրում է ԱԺ մեծամասնությանը կանոնակարգը կոպտորեն խախտելու մեջ` «Հանրաքվեի մասին» օրենքը փոփոխելու ընդդիմության նախաձեռնությանը խոչնդոտելու միջոցով:

«Այս պարագայում մենք բոյկոտեցինք անօրինական քվեարկությունը և առկախում ենք նման խորհրդարանի աշխատանքներին մեր մասնակցությունը», ասաց նա:

Ընդդիմադիրները պնդում են, որ «ապօրինի ռեժիմը հիմնովին ձախողվել է» և' ներքին, և' արտաքին քաղաքականության մեջ:

«Մենք միասնական և վճռական ենք Հայաստանում սահմանադրական կարգը վերականգնելու և օրինական իշխանություն հաստատելու հարցում: Հոգևարքի մեջ գտնվող ռեժիմի տապալումը կանխորոշված է», ասված է հայտարարության մեջ:

Բոյկոտելով խորհրդարանի աշխատանքները` ընդդիմությունը, սակայն, չի պատրաստվում վայր դնել մանդատները, և շարունակում է օգտվել խորհրդարանում հայտարարություն անելու հնարավորություններից:

«Խնդիրը մանդատը չէ, եթե հարկ լինի, միշտ էլ վայր կդնենք, - ասում է Շավարշ Քոչարյանը, - բայց այն տրամաբանությունը, որով առաջնորդվում է ընդդիմությունը, նշանակում է, որ մանդատները մեզ դեռ պետք են: Մենք պետք է հասնենք այն իրավիճակին, որ խորհրդարանում մեծամասնությունը ժողովրդի ճնշման տակ պատրաստ լինի գնալու այդ քայլերին»:

ԱԺ պետաիրավական հարցերի հանձնաժողովի նախագահ Ռաֆիկ Պետրոսյանի մեկնաբանությամբ Սահմանադրական դատարանի հայտնի որոշման մեջ կոնկրետացված չէ, թե «սուբյեկտը ով է»:

«Միայն կարելի է ենթադրել, թե ՍԴ-ն նկատի է ունեցել նախագահին», ասում է նա՝ պնդելով, թե ՍԴ-ն պարտավոր էր իր որոշման մեջ ուղղակիորեն նշել, թե ում նկատմամբ պետք է վստահության հանրաքվե անցկացվի:

Հանձնաժողովի նախագահի այսպիսի մեկնաբանությունը ըստ Դալլաքյանի «զավեշտական է»: «Դա ցույց է տալիս, որ իշխանությունները խուճապի մեջ են կապված հանրաքվեի անցկացման հետ, - ասում է նա: - «Հանրաքվեի մասին» օրենքում փոփոխությունն արդեն իսկ ավտոմատ կարգով օրակարգում է: Ժողովրդի հետ կգնանք ու կստիպենք, որ կատարվի Սահմանադրական դատարանի որոշումը»:

Ըստ «Ազգային միաբանության» նախագահ Արտաշես Գեղամյանի Հայաստանի ընդդիմության ձեռնարկած քայլերը լավ մտածված չեն եղել` ի տարբերություն Վրաստանի ընդդիմության վերջին հաջող իշխանափոխությունից:

«Պետք է մտածված իշխանափոխության գնալ, այնպես, որ վաղը, մյուս օրը խիղճներս հանգիստ լինի, - ասում է Գեղամյանը: - Ջրի երեսին եղած անօրինականությունների մասին գիտենք, իսկ ստորգետնյա այնպիսի զարհուրելի հանցագործություններ կան, որոնք, բնականաբար, կբացահայտվեն իշխանափոխության հենց հաջորդ օրը»:

Տպավորություն է ստեղծվում, որ «Արդարություն» և «Ազգային միաբանություն» ընդդիմադիր թևերը ի վերջո միավորվել են, թեև այդ մասին հայտարարություն դեռ չի արվել:

Ընդդիմությունն իր բոյկոտով հայտարարում է, որ երկրում սկսվել է խորհրդարանական ճգնաժամ, որի հանգուցալուծումը կլինի իշխանափոխությունը: Իշխող կոալիցիան բնականաբար չի կիսում այդ կարծիքը:

«Խորհրդարանական ճգնաժամ չկա այն պարզ պատճառով, որ մեծամասնությունը առկա է, մեծամասնությունը որակյալ է և որակյալ մեծամասնությունը շարունակում է օրինաստեղծ գործունեությունը», ասում է Դաշնակցության խորհրդարանական խմբակցության ղեկավար Լևոն Մկրտչյանը:

«Իհարկե, ինձ համար ցանկալի կլիներ, որ ընդդիմությունը մասնակցեր Ազգային ժողովի աշխատանքներին, բայց դա իրենք են որոշում, և պարտադրելու կամ ազդելու հնարավորություն չունենք, և ցանկություն էլ չկա: Բայց ցանկալի կլիներ, որ մասնակցեին», հայտնել է լրագրողներին վարչապետ Անդրանիկ Մարգարյանը:

Չորեքշաբթի օրը իշխանամետ հեռուստաընկերություններին տված իր հարցազրույցում նախագահ Քոչարյանն անդրադարձել է բոյկոտի հարցին. «Անկեղծ ասած՝ ես բոյկոտ չեմ տեսնում: Այն, ինչ կա այսօր, պարտավորությունների բոյկոտ է, - ասաց նախագահը, - Իմ գնահատմամբ դա փորձ է ցույց տալու, թե Հայաստանում ներքաղաքական ճգնաժամ կա»:

Իսկ ընդդիմության հնչեցրած իշխանափոխության, արտահերթ ընտրությունների մասին կոչերի և իրենց ուժերի միավորման մասին հայտարարությունների կապակցությամբ Քոչարյանն ասաց. «Միավորումն ընդդեմ մեկի ոչ մի երկրում ոչ մի լավ արդյունքի չի բերում»:

Նախագահն ասաց, որ իշխանությունները կդիմեն համապատասխան միջոցների, եթե օրենքը խախտվի: Նա նաև ասաց, որ իշխանափոխության միակ օրինական ճանապարհը սահմանադրական ճանապարհն է, և որ ինքը հրաժարական տալու մտադրություն չունի:


According to Agnes
 

  Inside
 

Matters of the Heart: The “prenup” comes to Armenia in new code on the family

Full story

 
 

Medical Malpractice: Writers' Union accuses district government of stealing its hospital

Full story

 
 

 


The Week in seven days

 
 


The Arts in seven days

 

  Photo of the week
 
Click on the photo above to enlarge.
 
 
 
 

Ombudsman Appointed

Ombudsmanship proves to be women's job in South Caucasus. Larisa Alaverdyan, Armenia's first ombudsman, was appointed by President Kocharyan, Thursday, February 19. Armenia is the third country of the region to appoint a woman for this position of human rights protector.

 

 





Copyright ArmeniaNow.com 2002-2017. All rights reserved.

The contents of this website cannot be copied, either wholly or partially, reproduced, transferred, loaded, published or distributed in any way without the prior written consent of ArmeniaNow.com.