Հինգշաբթի օրը տեղի ունեցած հարձակումն ընդդիմության աչքի ընկնող գործչի դեմ առաջ բերեց իշխանության հակառակորդների վրդովմունքը: Նրանք կարծում են, որ հարձակումը կանխամտածված էր և իրականացվել է իշխանությունների հրահանգով:

Մանուչարյանը «քողարկված» ընդդիմությունից է

Երևանի Թումանյան փողոցում օրը ցերեկով դաժան ծեծի է ենթարկվել Աշոտ Մանուչարյանը: 1980-ականների վերջին Մանուչարյանը «Ղարաբաղ» կոմիտեի անդամ էր, հետագայում` նախագահ Լևոն Տեր-Պետրոսյանի պաշտոնավարման առաջին ժամկետում, ներքին գործերի նախարար և նախագահի անվտանգության հարցերով խորհրդական:

Իրավապաշտպան Գայանե Մարկոսյանը, որը միջադեպի պահին եղել է Մանուչարյանի հետ, պատմում է, որ հարձակվողները երեք հոգի են եղել` սափրած գլուխներով: Մարկոսյանի հավաստմամբ, հարձակվողներից մեկը մի կողմ է հրել իրեն, իսկ մյուսները ծեծի են ենթարկել Մանուչարյանին` հարվածներ հասցնելով ձեռքերով ու ոտքերով: Մանուչարյանը բազմաթիվ վնասվածքներով և ծնոտոսկրի կոտրվածքով տեղափոխվել է հիվանդանոց, որտեղ ենթարկվել է վիրահատության:

1994 թվականին, տարաձայնությունների պատճառով Տեր-Պետրոսյանից բաժանվելուց հետո, Մանուչարյանը հեռացավ ակտիվ հրապարակային գործունեությունից, սակայն, ինչպես պնդում են, շարունակում է որոշակի ազդեցություն ունենալ ներկա ընդդիմության վրա:

Նա բավական ակտիվ գործունեություն է ծավալել Մտավորականների ֆորումում` չափավոր ընդդիմադիր մի միավորում, որը չի հարում ոչ մի կուսակցության, սակայն հակադրվում է իշխող վարչակազմին: Ինչպես հայտնում են, Մանուչարյանը գնում էր հենց Մտավորականների ֆորում, երբ ենթարկվեց հարձակման:

Մանուչարյանի ընկերներից մեկը, որը նրա հետ միասին ակտիվորեն մասնակցել է «Ղարաբաղ» կոմիտեի գործունեությանը, հայտնեց «ԱրմենիաՆաուին», թե հարձակումն «առանց որևէ կասկածի» կապված է ներկա ընդդիմադիր շարժման հետ:

«Այս հարձակումը,- ասաց Մանուչարյանի ընկերը,- ցույց է տալիս (իշխանությունների) հուսալքության աստիճանը, որը վախեցնող է»:

Բանաստեղծուհի Սիլվա Կապուտիկյանը, որը դարձել է ընդդիմության նշանավոր դեմքերից մեկն այն բանից հետո, երբ, ի նշան բողոքի ընդդիմության նկատմամբ կիրառված բռնությունների դեմ, հետ է վերադարձրել նախագահ Ռոբերտ Քոչարյանից ստացած պետական պարգևը, այսպես է արձագանքել Մանուչարյանի վրա կատարված հարձակմանը.

«Հայաստանում ծեծը դարձել է քաղաքականության հիմնական միջոց և պետական ահաբեկության ամենաազդեցիկ բաղկացուցիչ մասը: Ուժի կիրառման բոլոր դեպքերը պետք է դիտարկվեն այդ տեսանկյունից»:

Ոստիկանությունը հարձակման վերաբերյալ տեղեկություն չի տվել` արձանագրելով միայն, որ ընթանում է հետաքննություն:

Նախագահի մամլո խոսնակ Աշոտ Քոչարյանն ասաց, թե Մանուչարյանի վրա կատարված հարձակման կապակցությամբ Քոչարյանը հայտարարություն չի անելու, սակայն ավելացրեց, որ կարող է նախագահի անունից հայտնել, որ վերջինս «դատապարտում է» հարձակումը:

Հարձակումը Մանուչարյանի վրա տեղի ունեցավ այն նույն շաբաթ, երբ ձերբակալվել էր ընդդիմության առնվազն 76 կողմնակից` երեք շաբաթ առաջ ընդդիմության սկսած հանրահավաքների ընթացքում ձերբակալվածների ընդհանուր թիվը հասցնելով 500-ի: