Երևանից 128 կմ դեպի հյուսիս գտնվող Շիրակի մարզի Այգաբաց գյուղում առնվազն 40 գլուխ խոշոր եղջերավոր կենդանի է սատկել: Գյուղնախարարության անասնաբուժական պետական տեսչության պետ Անուշավան Աղաջանյանը նախնական կարծիք է հայտնել, թե մահվան պատճառը սիբիրախտն է:

Ըստ Այգաբացի գյուղապետ Գագիկ Ալթունյանի՝ կենդանիները սատկել են ապրիլի 15-ին անորակ պատվաստանյութով կատարված սրսկման
հետևանքով:

Գյուղնախարարությունը դեռևս չի հաստատել Ալթունյանի կասկածները՝ սպասելով Մոսկվա ուղարկված նմուշների հետազոտման պատասխանին:
ՀՀ գլխավոր սանիտարական բժիշկ Վլադիմիր Դավիդյանցը հավաստում է, որ գյուղացիները հետազոտվել են, և ոչ մեկի մոտ սիբիրախտով վարակվածություն չի հայտնաբերվել:

Գյուղապետն ասում է, որ թեև գյուղացիներն առողջ են, հասցված վնասը շատ մեծ է:

«Մի օրվա ընթացքում մեր ամբողջ գյուղը զրկվեց ապրելու իրավունքից,- ասում է Ալթունյանը: - Գրեթե բոլոր տները տուժել են: Պատվաստումը կատարվել է ապրիլի 15-ին, իսկ արդեն 16-ին կենդանիները սկսեցին իրար հետևից սատկել: Նրանք սկսեցին սատկել պատվաստումից հետո: Վնասը սարսափելի մեծ է, հատկապես մեզ՝ գյուղացիներիս համար, որոնց պահողը հենց այդ կենդանիներն էին»:

Պաշտոնյաների ուշադրությունը հրավիրվեց այն փաստի վրա, որ իրենց ձայնը լսելի դարձնելու համար ապրիլի 19-ին գյուղացիները փակել էին Երևան-Գյումրի մայրուղին, ոմանք նույնիսկ պառկել էին գետնին: Գյուղնախարար Դավիթ Լոքյանը խոստացավ հատուցել վնասը: Բացի այդ, կենդանի մնացած անասուններին պատվաստել են թարմ շիճուկով: Գյուղապետի հավաստմամբ՝ դրանից հետո վարակի նոր դեպքեր չեն գրանցվել:

«Գյուղը 12 օր կարանտինի մեջ պետք է մնա, այսինքն՝ ելումուտ չի լինելու, և մարդիկ չեն կարողանալու իրենց մթերքը վաճառել ու ապրել,- ասում է Ալթունյանը: - Նույնիսկ կարանտինից հետո գյուղի անունն ընկած կլինի, և պարզ չէ, թե գյուղացիները որտեղ են իրացնելու իրենց մթերքները»:

Վնասի չափերը դեռևս ճշտված չեն: Նախարար Լոքյանն առայժ չի հրապարակում անորակ պատվաստանյութ արտադրած ընկերության անվանումը, սակայն հայտարարել է, որ եթե պարզվի, թե կենդանիների անկման պատճառը պատվաստանյութն է, ապա վնասները կհատուցի այդ ընկերությունը: