ArmeniaNow.com - Independent Journalism From Today's Armenia
April 23, 2004




Ելույթ հայրենիքում. հանրահայտ սոպրանոյի երևանյան դեբյուտը


ճանաչված սոպրանո Իզաբել Բայրաքդարյանը երեքշաբթի՝ ապրիլի 20-ին, առաջին անգամ ելույթ ունեցավ Հայաստանում: Դահլիճը լեփ-լեցուն էր հանդիսականներով, որոնք պատրաստ էին գրկելու Նյու Յորքի «Մետրոպոլիտեն օպերայի» մեներգչուհուն:

Ես սիրահարվել եմ այս երկրին ու ժողովրդին

Արամ Խաչատրյանի անվան համերգասրահ եկած հանդիսականների թվում էին նախագահ Ռոբերտ Քոչարյանը և առաջին տիկին Բելլա Քոչարյանը:

90-րոպեանոց համերգի ծրագրում ընդգրկված էին ճաշակով ընտրված արիաներ տարբեր օպերաներից՝ Ռոսինիի «Շամիրամ» և «Սևիլյան սափրիչը», Մոցարտի «Հովիվ թագավորը», Պուչինիի «Բոհեմ» և «Ջանի Սկիկի», Տիգրանյանի «Անուշ» օպերաներից:

Բեյրութում ծնված կանադահայ երգչուհին հմտորեն ու հանգիստ էր հաղթահարում Ռոսինիի բարդ պասաժներն ու բարձր նոտաները: Նուրբ, բայց հնչեղ ձայնով, դերասանական անկաշկանդ վարպետությամբ նա կատարեց Շամիրամի արիան:

Սակայն առավել հետաքրքիր ու յուրօրինակ էր «Ասում են ուռին» երգի կատարումը «Անուշ» օպերայից: Հանդիսատեսին լավ ծանոթ այս երգը, որը սովորաբար ներկայացվել է կոլորատուրային սոպրանոյի կատարմամբ, այս անգամ հնչեց նուրբ ու պարզ ձայնով: Երգչուհու նազելի կատարումը պատկերեց Անուշի գեղջկական, մաքուր ու անմեղ կերպարը:

Բայրաքդարյանի հայաստանյան դեբյուտը հաջորդեց նրա 2002-2003 թթ. թատերաշրջանին, երբ նա, մասնավորապես, առաջին անգամ հանդես եկավ Փարիզում՝ Սուսաննայի դերակատարմամբ «Ֆիգարոյի ամուսնությունը» օպերայում: Նա նաև հանդես եկավ Կատերինայի դերերգով («Հայացք կամրջի վրայից») Նյու Յորքի «Մետրոպոլիտեն օպերայում» և Զերլինայի դերերգով «Դոն Ջովանի» օպերայում Զալցբուրգի փառատոնում:

2000 թվականին Բայրաքդարյանը հաղթող է ճանաչվել Պլաչիդո Դոմինգոյի հեղինակավոր «Օպերալիա» մրցույթում և արժանացել է Եղիսաբեթ II թագուհու «Ոսկե հոբելյան» մեդալին: Բայրաքդարյանի ձայնը հնչում է «Գրեմիի» մրցանակակիր «Երկու աշտարակ» («Մատանիների տիրակալը» եռերգության երկրորդ ֆիլմը), ինչպես նաև Ատոմ Էգոյանի «Արարատ» ֆիլմում:

Կանադայում 2002 թվականի մարտին լույս ընծայված նրա առաջին «Լույս ուրախության» ձայներիզն առաջին տեղ գրավեց դասական երաժշտության վարկանիշային աղյուսակում:

Երգչուհու հետաքրքրությունները չեն սահմանափակվում օպերայով: Իրականում նրա առաջին սերը հոգևոր երգերն են եղել: Բեյրութում նա մեծացել է Կոմիտաս և Սայաթ-Նովա երգելով:

«Հավատքս միշտ զորավոր է մնացել, քանի որ եկեղեցական երգեցողությունը գալիս է հոգուց և սրտից,- ասում է Իզաբելը: - Լուսինե Զաքարյան շատ եմ լսել, գուցե դրանից է, որ այդքան շատ եմ սիրում եկեղեցական երգեցողություն: Նրա ձայնը միշտ ականջիս մեջ է եղել»:

Բայրաքդարյանի առաջին այցը Հայաստան կվերածվի ֆիլմի. նրա հետ ժամանել է կանադական հեռուստատեսության նկարահանող խումբը:

Երգչուհին պետք է եզրափակեր այցը՝ ապրիլի 24-ին երգելով Եղեռնի հուշահամալիրում կազմակերպված արարողության ժամանակ: Սակայն Բայրաքդարյանը ստիպված էր մեկնել երեկ՝ ապրիլի 22-ին, որպեսզի վաղը Պլաչիդո Դոմինգոյի խնդրանքով ելույթ ունենա Լոս Անջելեսի օպերայում:

Այցելության ընթացքում երգչուհուն հաճախ էին հարցնում, թե ինչու է այսքան ուշ եկել Հայաստան, արդյոք ներքին մղում չի ունեցել շուտ տեսնելու հայրենիքը: Բայրաքդարյանը չէր շփոթվում հարցերից` տալով դիպուկ պատասխան. «Ոչ մի բանի համար երբեք ուշ չէ։ Անկեղծ ասած, կարող էի փոխել դժվար արտասանվող ազգանունս ու ավելի հեշտ ճանապարհ հարթել, բայց ցանկացել եմ, որ աշխարհի տարբեր կետերում, թեկուզ դժվարությամբ, հնչի այն՝ փաստելով հայ լինելս»։

«Հայաստան գալով հայությունս ավելի զորացավ,- ասաց Բայրաքդարյանը: - Արդեն մեկ շաբաթ հայրենիքում եմ ու չեմ ուզում գնալ, սիրահարված եմ հողին, ժողովրդին: Հայրենիքը միայն նկարներով ու գրքերով ճանաչելը մի բան է, հայրենի հողի վրա լինելը՝ բոլորովին այլ բան: Այստեղ ես զգում, թե որքան երկար պատմություն կա քո հետևում, և դու պիտի որոշես՝ շարունակելո՞ւ ես այդ պատմությունը, թե՞ ոչ: Ուրախ եմ, որ եկա, այսուհետ հաճախ եմ գալու»:

Երեքշաբթի Երևանում Բայրաքդարյանն արժանացավ բուռն ու երկրարատև ծափահարությունների և, հանդիսականների պահանջով վերադառնալով բեմ, ասաց երկրպագուներին. «Անչափ հուզված եմ, դժվարանում եմ խոսել»:

Զգալով, որ դժվարանում է խոսքերով արտահայտել իր երախտիքը, նա կատարեց Բարսեղ Կանաչյանի «Օրորը»՝ մեղմ, լայնաշունչ ձայնով, արցունքներ բերելով շատ հանդիսականների աչքերից:


According to Agnes
 

  Inside
 

Random or Planned?: Attack on former politician raises questions

Full story

 
 

Rural Tragedy: Anthrax suspected in death of cattle

Full story

 
Our Best in Budapest?: Can Armenia's choice handle the environment of an international murder trial?

Full story
 


 


The Week in seven days

 
 


The Arts in seven days

 

  Photo of the week
  Click here to enlarge.
Click on the photo above to enlarge.
 
 
 
 

Holywood

In honor of each of Armenia's Catholicoses, 131 evergreens were planted on the grounds of Saint Gregory the Illuminator Cathedral in Yerevan, April 18.

 

 



Copyright ArmeniaNow.com 2002-2017. All rights reserved.

The contents of this website cannot be copied, either wholly or partially, reproduced, transferred, loaded, published or distributed in any way without the prior written consent of ArmeniaNow.com.