ArmeniaNow.com - Independent Journalism From Today's Armenia
April 16, 2004




Արձագանքելու իրավունք. իրավապաշտպանները բողոքում են քաղաքացիական ազատությունների ոտնահարման դեմ

Հինգշաբթի մոտ հազար ցուցարար անձրևի տակ փողոց էր ելել բողոքելու Բաղրամյան պողոտայում երեքշաբթի օրը տեղի ունեցած բախման ժամանակ ոստիկանության ցուցաբերած (ցուցարարների արտահայտությամբ) դաժանությունների դեմ:

Կարո՞ղ ես ազատ խոսել

Ցուցարարները, որոնց մեծ մասն ուսանող էր, տանում էին պաստառներ «Ո՛չ ոստիկանապետությանը» և «Ազատություն» մակագրություններով: Նրանք շարժվեցին դեպի Բաղրամյան պողոտա, որտեղ փուչիկներ ամրացրին խորհրդարանի ցանկապատին՝ ի նշան բռնությունների ընթացքում մարմնական վնասվածքներ ստացած տասնյակ մարդկանց հետ համերաշխության: Որոշ ցուցարարներ կրում էին սպիտակ շապիկներ «Ես եմ ժողովուրդը» մակագրությամբ:

Այս միջոցառումն արդյունք էր ավելի վաղ Հայաստանի ամերիկյան համալսարանի գործարար կենտրոնում իրավապաշտպան կազմակերպությունների անցկացրած հանդիպման, որի մասնակիցներն իրենց բողոքը հայտնեցին Հայաստանում քաղաքացիական ազատությունների զանգվածային խախտումների դեմ:

«Մենք հիմա գտնվում ենք նույն վիճակում, ինչ 70-ականներին Խորհրդային Միությունը, երբ ցանկացած հասարակական գործունեություն անիմաստ էր դարձել,- ասում է Խոսքի ազատության պաշտպանության կոմիտեի նախագահ Վարդան Հարությունյանը: - Մենք հիմա այդ անկման դեմ ենք պայքարում»:

Ըստ իրավապաշտպանների՝ այն, ինչ կատարվում է Հայաստանում՝ մարդու իրավունքների ամենօրյա ոտնահարումներ ընդդիմադիր կուսակցությունների վերջին երկու շաբաթվա ցույցերի ընթացքում, ակնհայտ հետընթաց է դեպի խորհրդային ժամանակաշրջան:

«Այսօր Հայաստանում պետական ահաբեկություն է կատարվում սեփական ժողովրդի դեմ,- ասում է Հայաստանի Հելսինկյան կոմիտեի նախագահ Ավետիք Իշխանյանը: - Մարդու իրավունքների խախտումները համատարած են, և դրանք համակարգել հնարավոր չէ»:

Հանդիպմանը ներկա էր ոստիկանության ներկայացուցիչ, իրավական ապահովման վարչության պետի տեղակալ Հովհաննես Քոչարյանը: Նա ծափահարությունների արժանացավ, երբ հաստատեց, որ Երևան բերող մայրուղիները ոստիկանությունը վերջին օրերին իրոք փակել էր, որպեսզի կանխեր ցուցարարների մուտքը մայրաքաղաք:

Կանանց հիմնախնդիրներով զբաղվող յոթ հասարակական կազմակերպությունների հայտարարության մեջ նշվում էր, որ կանանց և անչափահասներին վերաբերող հարցերում տիրում է «վախի և անհանդուրժողության մթնոլորտ»:

Հանդիպմանը ներկայացված էր շուրջ 70 հասարակական կազմակերպություն, որոնք վստահեցրին, որ իրենք հետամուտ են ոչ թե քաղաքական, այլ քաղաքացիական նպատակների:

Անձրևի տակ ցույցի էր դուրս եկել մոտ հազար մարդ

«Այդ պայթյունների ձայնից (ոստիկանության կիրառած պայթուցիկ փաթեթների) ամբողջ քաղաքի քունը խանգարվել էր, և նրանք դեռ խոսում են ցուցարարների բարձրացրած աղմուկի մասի՞ն,- հարցնում է բնապահպանության նախկին նախարար Կարինե Դանիելյանը: - Մենք ՀՅԴ-ի և Հանրապետականի հետ ցույցեր, միտինգներ ենք արել, պիկետներ ենք արել՝ դաշնակցական կալանավորներին ազատելու համար: Ի՞նչ է, այն ժամանակ կարելի՞ էր, իսկ հիմա, երբ իրենք իշխանության մեջ են, չի՞ կարելի»:

Մասնակիցների մեջ էր նաև Երևանի պետական համալսարանի ուսանողներից կազմված խումբը, որին հաջողվեց կանխել «Զինապարտության մասին» օրենքում նախատեսված փոփոխությունները:

«Նոր Հայաստան» իրավապաշտպան հասարակական կազմակերպության նախագահ Էլեոնորա Մանանդյանը ստեղծված իրավիճակի համար մեղադրեց հասարակական կազմակերպություններին:

«Հնարավոր չէ զարգացնել գիտությունն ու կրթությունը, երբ ոտնահարված է օրենքը, երբ օրենքի գերակայությունը որպես այդպիսին արժեք չէ,- ասաց նա: - Ես չեմ մեղադրում ոստիկանությանը, ես մեղադրում եմ մեզ բոլորիս: Ի՞նչ քաղաքացիական հասարակություն, մենք հարմարվող հասարակություն ենք»:


According to Agnes
 

  Inside
 

Building Credit: Experts study means for mortgages in Armenia

Full story

 
 

The Right to React: Activists call for response to civil liberties abuses

Full story

 
 


 


The Week in seven days

 
 


The Arts in seven days

 

  Photo of the week
  Click here to enlarge.
Click on the photo above to enlarge.
 
 
 
 

Not Opposed to Blessing

Before all hell broke lose in the center of Yerevan the next day, His Holiness Garegin II offered blessings to worshippers attending Easter services. Roads linking Echmiadsin and the Holy See to Yerevan have been blocked, even on the Holy Day, to discourage travel to the capital for political rallies.

 

 



Copyright ArmeniaNow.com 2002-2024. All rights reserved.

The contents of this website cannot be copied, either wholly or partially, reproduced, transferred, loaded, published or distributed in any way without the prior written consent of ArmeniaNow.com.