ArmeniaNow.com - Independent Journalism From Today's Armenia
April 16, 2004




Տանգոյի ավանդույթներին հավատարիմ. հայաստանյան կվինտետը հարավամերիկյան մեղեդիներ է հնչեցնում Երևանում


Անցած կիրակի Արգենտինան «ժամանել» էր Հայաստան՝ տանգոյի մաեստրո Աստոր Պիացոլայի երաժշտությամբ ոգեշնչված կվինտետի կատարումներով:

Երաժիշտները նվագում էին կոմպոզիտորի ստեղծագործական ոգուն ընդգծված հավատարմությամբ, թեև բոլորն էլ հայաստանցիներ էին: Իսկ արդյունքը «Արամ Խաչատրյան» համերգասրահում հավաքված երևանյան հանդիսատեսին ընձեռված հազվագյուտ հնարավորությունն էր վայելելու տանգոյի զարմանալի հնչյունները:

Կվինտետը ստեղծվեց երկու ամիս առաջ՝ Պիացոլայի երկրպագու երաժիշտներից

Դաշնամուրի, կիթառի, ջութակի, կոնտրաբասի և ակորդեոնի յուրահատուկ համադրությամբ ստեղծված երաժշտությունը հանդիսատեսին պարգևեց 90 րոպե տանգոյի ռիթմեր ու խելացնոր հորձանուտի տրամադրություն:

Կվինտետի համար Պիացոլայի ստեղծագործությունները Հայաստանում առաջին անգամ կատարեցին միջազգային մրցույթների դափնեկիրներ Արմեն Բաբախանյանը (դաշնամուր), Հակոբ Ջաղացպանյանը (կիթառ), Վարազդատ Խաչումյանը (ջութակ), Խաչատուր Սավզյանը (կոնտրաբաս), ինչպես նաև Գևորգ Գասպարյանը (ակորդեոն):

Հայաստանում քչերին հայտնի այս կոմպոզիտորի ստեղծագործությունների կատարման մտահղացումը ծնվել էր դեռ վաղուց:

«Ես առաջին անգամ Պիացոլայի ստեղծագործությունները լսել եմ 1992 թվականին, ու այդ օրից նրա գործերը կատարելու ցանկությունն ինձ հանգիստ չէր տալիս, բայց ինչպե՞ս, ո՞ւմ հետ»,- ասում է Արմեն Բաբախանյանը:

Հետագայում պարզվեց, որ Երևանում կան այլ երաժիշտներ, որոնք նույնպես փափագում են կատարելու Պիացոլայի փոթորկահույզ ստեղծագործությունները: Երաժիշտներն այս գաղափարով վարակեցին նաև պրոդյուսեր Նիկա Բաբայանին, և ընդամենը 2 ամիս առաջ ստեղծվեց կվինտետը:

«Անսամբլը ոչ միայն ոճական առումով է յուրահատուկ, այլ նաև անդամների խառնվածքով,- նշում է Նիկա Բաբայանը: - Այս երաժշտությունը կատարելու համար լավ, պրոֆեսիոնալ երաժիշտ լինելը քիչ է, դրանով պետք է ապրել, զգալ կողքինին ողջ մարմնով ու հոգով, նստած տեղում ներքուստ պարել»:

Ըստ Ջաղացպանյանի՝ խմբի անդամների միջև հոգևոր կապը հաջողվեց, քանզի բոլորը խանդավառված էին երաժշտությամբ ու անգամ մի քանի շաբաթ տևած փորձերը գերագույն հաճույք ու լիցք էին նրանց համար:

Կատարողները փոխանցում են իրենց զգացմունքներն ունկնդիրներին

«Այս երաժշտությունն ինձ հրապուրում է նրանով, որ լի է անակնկալներով,- ասում է կիթառահար Ջաղացպանյանը: - Ես կյանքում ոչինչ չեմ ծրագրում ու չեմ պատրաստվում որոշակի ծրագրով ապրել, նույնը՝ երաժշտության մեջ. պետք է անընդհատ նոր, անսպասելի հույզեր արթնացնես ունկնդրի հոգում»:

Երաժիշտներն ապրում էին երաժշտությամբ ու իրենց ներքին ապրումները փոխանցում ունկնդիրներին: Բաբախանյանի մատների նուրբ հպումը ստեղնաշարին տանգոյի թեթև պարային քայլեր էր հիշեցնում, իսկ Գասպարյանը կարծես ակորդեոնի փոխարեն իր պարընկերուհուն գրկած լողում էր երաժշտության ալիքների վրա: Ջաղացպանյանի կիթառը միաժամանակ կրքոտ, ռիթմիկ ու մեղեդային էր՝ լրացնելով Խաչումյանի ջութակի քնքուշ հնչյունները, որոնք մետաքսե ժապավենի նման ճախրում էին օդում:

«Ես բազմիցս լսել եմ Պիացոլային,- ասում է արգենտինացի երգիչ Խուան Պուգլիեսենոն, որն այժմ սովորում է Երևանի կոնսերվատորիայում,- մենք ապրում էինք նույն փողոցում, դեմուդեմ, բայց այս համերգի ընթացքում միանգամայն երկնային զգացողություն ունեցա, ամեն ինչ կատարյալ էր»:

Պիացոլան՝ հակասական ու հախուռն այդ կոմպոզիտորը, թողել է հարուստ ժառանգություն` տանգոներ, երգեր տանգոյի համար, կինոերաժշտություն, ստեղծագործություններ կիթառի և ֆլեյտայի, կամերային և այլ նվագախմբերի համար:

«Այն, ինչ կատարեցինք համերգի ընթացքում, Պիացոլայի ստեղծագործական ժառանգության մի փոքր մասն է: Մենք մտադիր ենք հանդիսատեսի համար բացահայտելու տանգոյի հույզերով լի աշխարհը»,- ասում է Բաբախանյանը:

Ըստ պրոդյուսեր Նիկա Բաբայանի՝ կվինտետը համերգներով հանդես կգա նաև հուլիսին և սեպտեմբերին, նոր ստեղծագործություններով ու պարային կատարումներով:

«Երաժիշտները պատրաստում են ծավալուն ու հետաքրքիր ծրագիր, որը ներառնում է տանգոյի մեղեդիներ սկզբնական շրջանից մինչև այսօր: Հյուրախաղերն ու հանդիսատեսի համար բազում անակնկալները դեռ առջևում են»,- խոստանում է Բաբայանը:


According to Agnes
 

  Inside
 

Building Credit: Experts study means for mortgages in Armenia

Full story

 
 

The Right to React: Activists call for response to civil liberties abuses

Full story

 
 


 


The Week in seven days

 
 


The Arts in seven days

 

  Photo of the week
  Click here to enlarge.
Click on the photo above to enlarge.
 
 
 
 

Not Opposed to Blessing

Before all hell broke lose in the center of Yerevan the next day, His Holiness Garegin II offered blessings to worshippers attending Easter services. Roads linking Echmiadsin and the Holy See to Yerevan have been blocked, even on the Holy Day, to discourage travel to the capital for political rallies.

 

 



Copyright ArmeniaNow.com 2002-2017. All rights reserved.

The contents of this website cannot be copied, either wholly or partially, reproduced, transferred, loaded, published or distributed in any way without the prior written consent of ArmeniaNow.com.