Փետրվարի 19-ի ընտրություններից հետո իր առաջին զանգվածային հավաքի ժամանակ նախագահ Ռոբերտ Քոչարյանի ճամբարն այսօր ցուցադրեց իր ուժը՝ առնվազն երկու անգամ ավելի շատ մարդ հավաքելով իր ցույցին, քան ընդդիմությանը երբևէ հաջողվել էր:

Մատենադարանի մոտ Քոչարյանի հանրահավաքին զուգահեռ՝ Հանրապետության հրապարակում հավաքվել էին Ստեփան Դեմիրճյանը և նրա կողմնակիցները: Եվ եթե ընդդիմության կողմնակիցները դժվարությամբ էին լցնում Հանրապետության հրապարակը, ապա Մատենդարանի մոտ հավաքվածները բերնեբերան լցրել էին դիմացի տարածքը և ձգվում էին մինչև Օպերայի հրապարակ՝ խցանելով երթևեկությունը քաղաքի կենտրոնում:

Դեմիրճյանն ուժեղ քաղաքական հենարան ունի մարզերում, և հանրահավաքի եկածները ձգտում էին արտացոլել դա Հայաստանի գյուղական շրջաններին հատուկ հագուստով և արտաքին տեսքով: Ի հակադրություն՝ Քոչարյանի այսօրվա հանրահավաքի մասնակիցների մեծ մասը, ակնհայտորեն, քաղաքաբնակներ էին:

Այսօրվա հավաքը կազմակերպել էր Դաշնակցությունը՝ Քոչարյանի ամենահավատարիմ կողմնակիցն ու Հայաստանի հնագույն քաղաքական կուսակցություններից մեկը: Նրա հմտությունը հանրահավաք կազմակերպելու մեջ զգացվում էր դրոշների քանակից և հսկայական տեսամոնիտորից, որի վրա մի քանի հարյուր մետրից երևում էր հռետորների հարթակը:

«Մեզ այնպիսի հաղթանակ է պետք, որ ապացուցենք բոլոր նրանց, ովքեր մեղադրում են մեզ կեղծիքների մեջ, որ մեր հաղթանակն ակնհայտ է, - ասաց Քոչարյանը՝ դիմելով հավաքվածներին, - Ընդդիմությունը փորձում էր ապակայունացնել երկիրը և ժողովուրդը հանել ժողովրդի դեմ»:

Հետո նախագահը որպես օրինակ թվարկեց անկախ Հայաստանի պատմության վճռորոշ այն պահերը, երբ անկայուն քաղաքական մթնոլորտը դժվարություններ է ստեղծել երկրի համար, որոնց թվում՝ Ղարաբաղյան պատերազմը (1991-1994 թթ.), նախագահ Լևոն Տեր-Պետրոսյանի հրաժարականը պաշտոնավարման երկրորդ ժամկետի ընթացքում (1998 թ.) և ահաբեկչությունը խորհրդարանում 1999 թվականին:

«Միայն պատերազմը կարող է արդարացում համարվել երկրի առջև կանգնած դժվարությունների համար, - ասաց Քոչարյանը, - Մյուս երկուսը երկրում իրավիճակն ապակայունացնելու արհեստական փորձեր էին»:

Նախագահն ասաց, որ երկիրը դեռևս խնդիրներ ունի, սակայն դիմեց հավաքվածներին՝ խնդրելով հնարավորություն տալ լուծել դրանք՝ իրեն վերընտրելով:

Ելույթը, որ տևեց 15-20 րոպե, սկսվեց կայունության թեմայով և ավարտվեց դրանով:

«Մեր ծրագրերի միակ նպատակը մարդկանց կյանքը բարելավելն է», - եզրափակեց նախագահը:

Դաշնակցության գերագույն խորհրդի անդամ Վահան Հովհաննիսյանը հայտարարեց, որ Քոչարյանի վերընտրության դեպքում երկիրը «կմաքրվի» բոլոր նրանցից, ովքեր Դեմիրճյանին սատարելով՝ փորձում են խուսափել քրեական պատասխանատվությունից:

«Մենք հավաքվել ենք այստեղ, որպեսզի ապացուցենք աշխարհին, որ Ռոբերտ Քոչարյանն ընտրվելու համար կեղծիքների ու խաբեության կարիք չունի, - ասաց Հովհաննիսյանը, - Այստեղ են մարդիկ այն 700000-ից, ովքեր քվեարկել են նրա օգտին: Մենք այստեղ ենք եկել մեր սեփական կամքով»:

Սակայն ներկաներից ոմանք հայտնեցին «ԱրմենիաՆաուին», որ իրենց մասնակցությունն այնքան էլ կամավոր չի եղել:

Գյուղատնտեսական ակադեմիայի ուսանողները, որոնք երկուշաբթի ցերեկը սովորաբար դասախոսություններ են ունենում, ասացին, որ դասախոսներից մեկը ստիպել է իրենց գնալ հանրահավաքի՝ ասելով, որ եթե չգնան, «իրենց համար վատ կլինի»:

Իսկ որոշ բանվորներ, այդ թվում՝ «Գրանդ սան» և «Գրանդ քենդի» գործարաններից, հայտնեցին, որ իրենց նստեցրել են ավտոբուսներ և բերել են հանրահավաքի՝ առանց ասելու, թե ուր են տանում:

Որոշ բանվորներ ասացին, որ ավտոբուս նստեցնելիս վերցրել են իրենց աշխատանքային քարտերը՝ խոստանալով վերադարձնել հանրահավաքից վերադառնալուց հետո: Իսկ ոմանք ավելացրին, որ իրենց ասել են. - «Եթե հանրահավաքի չգնաք, կարող եք վաղն աշխատանքի չգալ»:

Էջմիածնի քաղաքապետարանի մի աշխատակից հայտնեց, որ իրեն հրամայել են իր աշխատակիցներին տանել հանրահավաքի: Նա ասաց, որ ինքը շատ անհանգստացած է, թե ինչ է պատահելու իր հետ, որովհետև իր պատասխանատվության տակ գտնվող 60 հոգուց հանրահավաքը սկսվելու պահին մնացել են ընդամենը հինգը:

Ընտրարշավ 2003-ի այլ լուրերից.

• Երեկ Հանրային հեռուստատեսությունը հայտարարեց, որ այսօր երկու թեկնածուներն ուղիղ եթերում մասնակցելու են երկու-ժամանոց հեռուստատեսային բանավեճի և պատասխանելու են վեց լրագրողների հարցերին: Սակայն մինչ ընթանում էին հանրահավաքները, արդեն հայտարարվել էր, որ Դեմիրճյանը հրաժարվել է մասնակցելուց՝ պատճառաբալեով, որ իրեն չի բավարարում բանավեճի ֆորմատը:
  
  Այսօր երեկոյան Դեմիրճյանի մամլո քարտուղար Ռուզաննա Խաչատրյանը հայտնեց «ԱրմենիաՆաուին», որ Հանրային հեռուստատեսության առաջարկած ֆորմատը ոչ թե բանավեճ է, այլ ավելի շատ հիշեցնում է Քոչարյանի մամլո ասուլիսը:
  
  Դեմիրճյանի շտաբը հայտարարել է, որ իրենց թեկնածուն կմասնակցի բանավեճին, եթե իրենք համոզված լինեն, որ մասնակիցների թվում կլինեն «ընդդիմադիր» լրագրողներ և կընդգրկվեն հարցեր կառավարության լեգիտիմության և փետրվարի 19-ի ընտրությունների օրինականության մասին:
  
  
• Շաբաթ օրը Գարեգին Բ կաթողիկոսը կոչ է արել ազատ արձակել Դեմիրճյանի նախորդ հանրահավաքներից հետո կալանվածներին: Ըստ Արդարադատության նախարարության, 155 կալանվածներից 70-ին ազատ են արձակել:

(Հոդվածում օգտագործվել են «ԱրմենիաՆաուի» թղթակիցներ Ժաննա Ալեքսանյանի, Սուրեն Դեհերյանի, Մարիաննա Գրիգորյանի, Վահան Իշխանյանի և Գայանե Մկրտչյանի նյութերը:)