ԱՄՆ կառավարության կողմից հովանավորվող լրատվամիջոցների
զարգացման «Ինտերնյուս» ծրագիրը կոչ է անում Հայաստանի
լրագրողներին «զինվել խիզախությամբ և օբյեկտիվությամբ
ընտրական քարոզարշավի այս վերջին դժվարին օրերին»:
Այսօր «Ինտերնյուսի» երևանյան գրասենյակում կայացած
մամլո ասուլիսի ժամանակ ծրագրի ղեկավար Ուիլյամ
Քանթերը և կառավարիչ տնօրեն Նունե Սարգսյանը հայտնեցին
լրագրողներին, որ իրենց գործակալությունը մտահոգված
է նախագահական ընտրությունների ժամանակ լրատվամիջոցների
նկատմամբ կիրառված սպառնալիքների, ֆիզիկական հարձակումների
և ձայնագրող սարքերի ոչնչացման դեպքերի կապակցությամբ:
«Այս միջադեպերը լրջորեն արգելակում են քաղաքացիական
հասարակության առաջընթացը Հայաստանում, - ասաց Քանթերը,
- Ես խորապես մտահոգված եմ, որ ազատ, անաչառ և օբյեկտիվ
լրատվության զարգացումը բախվում է այդպիսի լուրջ
խոչընդոտների հետ»:
Վետերան հայ լրագրող Սարգսյանն անցյալ շաբաթ կայացած
նախագահական ընտրությունները համարեց «մեկ քայլ
հետ» ժողովրդավարական սկզբունքներից՝ նշելով, որ
այս ընտրությունների ժամանակ լրագրողներն իրենց
գործողություններում ավելի շատ էին սահմանափակված,
քան նախորդներում:
«Ամեն
անգամ ալիքները փոխելիս՝ բախվում էինք կողմնակալ
տեղեկատվության հետ և ամոթի զգացում էինք ունենում,
- ասաց Սարգսյանը, - Մենք մատնվել էինք շփոթության՝
տեսնելով, որ իրականությունն ադեկվատ կերպով չի
արտացոլվում»:
Մամլո ասուլիսին ներկա շուրջ 40 լրագրողներին
բաժանվեց «Ինտերնյուսի» հայտարարությունը, որում
գործակալությունն անվանում է ընտրությունները «ԶԼՄ-ների
պրոֆեսիոնալիզմի փորձություն»՝ ավելացնելով, որ
«Հայաստանի լրատվամիջոցները, և հատկապես՝ հեռուստատեսությունն
ու ռադիոն, չհանձնեցին 2003 թ. փետրվարի քննությունը»:
Քննադատելով լրատվամիջոցների գործունեությունը՝
Սարգսյանն ասաց, որ հանդիպման նպատակը ոչ թե լրագրողներին
մեղադրելն է, այլ նրանց աշխատանքը բարելավելու ուղիներ
գտնելը:
«Հայաստանում
մեր առաքելությունն է ամրապնդել անկախ լրատվությունը
և տեղեկատվության օբյեկտիվ և ազնիվ տարածմանը նպաստող
միջավայր ապահովել բոլոր լրագրողների համար», -
ասաց Քանթերը:
Մեկ ժամանոց հանդիպման մեծ մասը հատկացվեց «Ինտերնյուսի»
սեփական հեռուստատեսային հաղորդումներից մեկին:
Ամեն շաբաթ «Ինտերնյուսը» թողարկում է 20-րոպեանոց
լրատվական «Դիտակ» ծրագիրը, որն անդրադառնում է
մեկ թեմայի, որը ծրագրի ասիստենտ Տաթևիկ Հովհաննիսյանն
անվանեց «դիտակ, խոշորացույց, հետո՝ մանրադիտակ»:
«Ինտերնյուսի» հայաստանյան ծրագրի կարևորագույն
բաղկացուցիչ մասերից է «Դիտակի» պատրաստումն ու
բաշխումը հանրապետության 23 հեռուստակայաններին:
Անցյալ շաբաթվա թողարկումը նվիրված էր ենթադրյալ
ընտրակեղծիքներին և ընդգրկում էր տեսանյութ ընտրողների
մեղադրանքների մասին, այդ թվում՝ մի խումբ բողոքում
էր, որ իրենց առաջարկել են մինչև 10000-ական դրամ
իրենց քվեների համար, սակայն հետո չեն վճարել:
(Տեսերիզի հատվածները տեսնելու համար սեղմել այստեղ:)
«Ինտերնյուսը»
հայտնում է, որ պայմանավորվածություն ունի բոլոր
23 հեռուստակայանների հետ ամեն շաբաթ «Դիտակը» եթեր
արձակելու մասին: Սակայն անցյալ կիրակի իշխանամետ
համարվող «Շանթ» հեռուստակայանը հրաժարվեց եթեր
արձակել «Դիտակը»:
«Ինտերնյուսի» պրոդյուսեր Արմեն Սարգսյանն ասում
է, որ դա «Դիտակի» 66-րդ թողարկումն էր 2001 թ.
նոյեմբերից և առաջինը, որ «Շանթը» հրաժարվեց եթեր
արձակել:
«Շանթ» հեռուստաընկերության տնօրեն Արթուր Եզեկյանը
հայտնեց «ԱրմենիաՆաուի» թղթակցին, որ իրենք հրաժարվել
են եթեր արձակել հաղորդումը, որովհետև այն կողմնակալ
էր:
«Հաղորդումը սկզբից մինչև վերջ աչառու և կողմնապահ
էր, - ասում է Եզեկյանը, - Ներկայացված էին միայն
մեկ կողմի մեկնաբանությունները՝ առանց մյուս կողմի
տեսակետը ներկայացնելու»:
Ընտրություններին առնչվող այլ լուրերից.
- Այսօր արձանագրվել են ընտրությունների հետ
կապված նոր ձերբակալություններ: Շենգավիթի համայնքում
առնվազն երեք հոգի կալանվել են 15 օրով:
Շենգավիթի ավագանու ղեկավար Էդիկ Մադաթյանին,
որին ձերբակալել էին փետրվարի 22-ին չարտոնված
ցույցերի դեմ պայքարի շրջանակներում, տարել են
հիվանդանոց՝ արյունահոսող ստամոքսի խոցով:
- Հայաստանում հեռարձակվող ռուսական «HTB» հեռուստաալիքն
անհետացել է եթերից չորեքշաբթի երեկոյան՝ հակակառավարական
ցույցերի լուսաբանման պահին: Ռադիոյի և հեռուստատեսության
ազգային հանձնաժողովի հավաստմամբ, ալիքը Հայաստանում
հաղորդման տեխնիկական խնդիրներ ունի: Չորեքշաբթի
օրվանից ալիքը եթեր դուրս չի գալիս, սակայն ակնկալվում
է, որ այն կվերականգնվի:
- Չորեքշաբթի օրն ընդդիմությունը հայտարարել
էր, որ շաբաթ օրը հանրահավաք է անցկացնելու Մատենադարանի
մոտ: Երեկ Հայաստանի հնագույն կուսակցություններից
մեկը՝ «Դաշնակցությունը», որը սատարում է նախագահ
Ռոբերտ Քոչարյանին, հայտարարել է, որ նույն ժամին
նույն տեղում հակացույց է անցկացնելու:
Սակայն այսօր խորհրդարանում դաշնակցական խմբակցության
ղեկավար Աղվան Վարդանյանը հայտնեց «ԱրմենիաՆաուին»,
որ այսօր երեկոյան Քոչարյանին սատարող այլ կուսակցությունների
հետ որոշում կկայացվի նույն ժամին հանրահավաք
անցկացնելու մասին:
- Երեկ Քոչարյանն այցելեց մի քանի ընտրական շտաբեր:
Այսօր նա այցելեց Ծիծեռնակաբերդի հուշարձանը՝
հարգանքի տուրք մատուցելու 15 տարի առաջ Ադրբեջանի
Սումգայիթ քաղաքում կազմակերպված ջարդերի զոհերի
հիշատակին:
- Նախկին Արտաքին գործերի նախարար և չկայացած
նախագահական թեկնածու Ռաֆֆի Հովհաննիսյանն այսօր
ներկայացավ դատարան՝ միջնորդելով, որ վերանայվի
իր քաղաքացիության կարգավիճակը: ԱՄՆ-ում ծնված
Հովհաննիսյանին Հայաստանի քաղաքացիություն է շնորհվել
2001 թվականին, սակայն նա պնդում է, որ իրեն անօրինականորեն
են մերժել քաղաքացիություն տալ, երբ նա այդ հարցով
դիմել է առաջին անգամ 1991 թվականին: Այս ամսվա
սկզբին դատարանը վճիռ կայացրեց, որ Հովհաննիսյանը
չի կարող իր թեկնածությունն առաջադրել նախագահի
պաշտոնի համար, քանի որ չի բավարարում 10 տարվա
քաղաքացիության պայմանը:
Դատարանի պատասխանը նրա վերջին միջնորդության
կապակցությամբ սպասվում է մեկ շաբաթից:
(Հոդվածում օգտագործվել են «ԱրմենիաՆաուի»
թղթակիցներ Ժաննա
Ալեքսանյանի և Վահան Իշխանյանի նյութերը:)
|