Հայաստանում ծխում է ամեն երկրորդ չափահաս:

Առողջապահության նախարարության այս և նման այլ տեղեկությունները վկայում են այն մասին, որ մոտ ապագայում շնչուղիների հիվանդությունները հանրապետությունում լայն տարածում են ստանալու:

Ամեն երկրորդ հայաստանցի ծխող է:

Վիճակագրության համաձայն, հանրապետությունում ծխող կանանց թիվը վերջին տարիներին աճել է ավելի քան 35 տոկոսով: Սա մտահոգիչ միտում է, սակայն ավելի մտահոգիչ է ցուցանիշների գրեթե նույն աճը 12-17 տարեկան անչափահասների շրջանում: Առողջապահության մասնագետների հավաստմամբ, արձանագրվում են նաև դեպքեր, երբ ծխողը մինչև 12 տարեկան երեխա է:

Այս և նման տվյալների վրա է հիմնվում Հայաստանում ծխելու դեմ ուղղված պայքարը, որի դրսևորումներից մեկը մասնակցությունն է վաղը՝ մայիսի 31-ին, կայանալիք չծխելու համաշխարհային օրվան:

Հարություն Մինասյանը 17 տարեկան է և արդեն 3 տարի է, ինչ ծխում է:

«Ես չգիտեմ, թե ինչից սկսվեց հետաքրքրությունս ծխախոտի հանդեպ, - մոխրամանում հերթական ծխախոտի մնացորդը մարելով ասում է երիտասարդը: - Իմ շրջապատում գրեթե բոլորը ծխում են, և՛ ծնողներս, և՛ ընկերներս, միգուցե դա էլ է ինչ-որ ազդեցություն թողել է իմ ընտրության վրա»:

Հոգեբանների հավաստմամբ, ծխելու կամ չծխելու ընտրության վրա մեծ ազդեցություն է թողնում շրջապատը: Իսկ այստեղ, որտեղ միայն վերջերս են սահմանափակումներ մտցվել գովազդի հանդեպ, ծխելու ցանկությունը խրախուսվում է:

«Գովազդները և հասարակությունը համոզում են, որ տղամարդը պետք է ծխի իր տղամարդկությունն ապացուցելու համար, իսկ կինը՝ խորհրդավոր երևալու համար, - ասում է հոգեբան Սոնա Մարկոսյանը: - Ինչ խոսք, այս ամենը մեծ ազդեցություն է ունենում հատկապես երիտասարդների վրա, որի արդյունքը մենք բոլորս ենք տեսնում»:

Անցյալ տարվա օգոստոսին ընդունված նոր օրենսդրությունը լուրջ սահմանափակումներ է դնում ծխախոտի հեռուստա և ռադիոգովազդի ոլորտում: Այն նաև արգելում է նման գովազդը թերթերի և ամսագրերի շապիկների վրա:

Ծխախոտ արտադրող ձեռնարկությունները լրացրեցին գովազդի պակասը փողոցային գովազդային վահանակներով:

Ալեքսանդր Բազարջյանը համակարգում է առողջապահության նախարարության հակածխախոտային ծրագիրը և ասում է, որ գովազդատուներն օրենքը շրջանցելու ուղիներ են գտնում: «Երբեմն լինում են դեպքեր, երբ հեռուստատեսությամբ ինչ-որ կերպ թաքնված ծխախոտի գովազդ է հեռարձակվում», - ասում է նա՝ ավելացնելով, որ պատժամիջոցներ կիրառելն արդեն հեռուստատեսության և ռադիոյի հանձնաժողովի և օրինապահ մարմինների գործն է:

Չնայած վիճակագրական տվյալներին, մասնագետները հավաստում են, որ ծխելու դեմ վերջին քարոզարշավները տվել են իրենց արդյունքը: Որոշ ծխողներ թողնում են այդ սովորությունը, իսկ դեռահասներին սովորեցնում են չսկսել ծխել:

«Ինչ խոսք, ոչ մի հակածխախոտային ծրագիր չի կարող մեկ տարում իրականացվել, - ասում է Ալեքսանդր Բազարջյանը, - սակայն աշխատանքները կատարվում են, և փոփոխություններն ակնհայտ կդառնան ժամանակի հետ»: