«Արամ» ֆիլմի գովազդային պաստառը:

Ղարաբաղյան պատերազմ... ռումբերի ահեղ ձայնից ու մահացու հարվածներից գետնահորերում ծվարել են երեխաները: Վախով ու կարոտով լի նրանց աչքերը սարսափահար նայում են իրենց սգացող մայրերին:

Մի ծեր կին կանգնած է իր տան փլատակների մեջ. «Խաղաղություն ենք ուզում, միայն խաղաղություն տվեք մեզ»:

Այսպես է սկսվում «Արամ»-ը՝ կինոռեժիսոր Ռոբեր Քեշիշյանի առաջին լիամետրաժ ֆիլմը: Այն արդեն 3 ամիս ամեն օր ցուցադրվում է Փարիզի 5 կինոթատրոններում, իսկ ապրիլի 23-ին «Մոսկվա» կինոթատրոնում սկսվեց ֆիլմի հայաստանյան ցուցադրումը:

Ֆիլմի գործողութունները ծավալվում են Փարիզում, ուր գաղտնի ժամանում է Արամը (դերակատար՝ Սիմոն Աբգարյան), որին ընտանիքը համարում է Ղարաբաղում անհայտ կորած: Նա պատրաստվում է վրեժ լուծել եղեռնի զոհերի և հաշմանդամ եղբոր համար՝ սպանելով թուրք գեներալի:

Թեև եղեռնը ֆիլմում բացահայտ չի ներկայացվում, հանդիսատեսն անմիջպես ըմբռնում է տողերի արանքում դրված իմաստը:

Ռոբեր Քեշիշյանը և Սերժ Ավեդիքյանը մամլո ասուլիսում:

«Իր «Արամ» ֆիլմով Քեշիշյանն ընդգծում է իր անհատականությունը, ընտանեկան ողբերգության և ահաբեկչության միջոցով առաջ քաշելով հայոց եղեռնի չսպիացած վերքերը, - գրել է «Լը Մարսեյ» թերթը: - Ֆիլմի գիշերային մի տեսարանում Ռոբեր Քեշիշյանը Փարիզը ներկայացրել է որպես մի անհայտ քաղաք, որը թաքցնում է իր գաղտնիքները վտարանդուն հատուկ զգուշությամբ, անվերջանալի միալար, մելամաղձոտ երաժշտությամբ, որը հիշեցնում է 1915-16 թվականների հայոց եղեռնը»:

«Ֆիլմում բազմաթիվ են գիշերային Փարիզի տեսարանները, ուր սև ու սպիտակի ներդաշնակությունը վերածվում է տարբեր երանգների, հայկական երգերը, որոնք տառապանքի ձայն են կարծես, որ հնչում են որպես բողոք, և խորիմաստ հայացքները, որոնք ավելի շատ են, քան երկխոսությունները»:

Մի մարդ գիշերային մթության մեջ լուռ, սևեռուն հայացքով քայլում ու միևնույն ժամանակ ամրագրում է իր թշնամիների և համախոհների հայացքները: Աչքերը հոգնած են, տանջված, բայց կրակով լի, հոգին լի է սիրով ու վրեժով: Արամն է, որ և՛ մարդասպան է, և՛ արդարություն ու հատուցում փնտրող որդի, որն արցունքոտ աչքերով կարող է ծնկի իջնել հոր առջև ու ներողամտություն հայցել:

Անցյալ շաբաթվանից «Արամը» ցուցադրվում է «Մոսկվա» կինոթատրոնում:

«Արամն այն հերոսն է, որ կուզենայի լինել, բայց չեմ, որովհետև խոսք եմ տվել ծնողներիս, որոնք արդեն կորցրել էին իրենց 3 որդիներին», - ասում է Քեշիշյանը: Փարիզում ծնված 63-ամյա արվեստագետն առաջին անգամ է Հայաստանում, քանզի ինքն իրեն և ծնողների հիշատակին խոսք էր տվել, որ չի գա Հայաստան, մինչև չստեղծի այս ֆիլմը:

«Ես ուզում էի ոտք դնել հայրենիք նրա իսկական զավակը դարձած, ուզում էի ասել այդ հողին, որ արել եմ այն, ինչ կարող էի և պետք է անեի»:

Ֆիլմի ստեղծման գաղափարը ծնվել է 1988-1989 թթ. հայ ազատագրական շարժման ծավալման և ղարաբաղյան պատերազմի հետ:

Արամի կերպարը հիմնված է Սողոմոն Թեհլերյանի կենսագրության վրա, որը սպանել է թուրք դեսպանի: Այն ունի նաև պատերազմում զոհված Ղարաբաղի հերոս սփյուռքահայ Մոնթե Մելքոնյանի բնորոշ գծերը:

Քեշիշյանն անվանել է ֆիլմն իր հոր անունով, որը որբացել և վտարանդի է դարձել 14 տարեկանում:

«Արամն իմ որդիական սիրո և մարդկայնության կատարյալ համակցությունն է, նա ազատագրական պայքարի ելած մարտիկի ընդհանրացված կերպար է: Ես հարգանքի իմ տուրքն եմ տալիս Ղարաբաղի հերոսներին ու փորձում անմահացնել նրանց Արամի կերպարով», - ասում է Քեշիշյանը: