Ե՛վ Սարգիս Սարգսյանը, և՛ Դավիթ Նալբանդյանը պարտություն կրեցին «Փասիֆիք լայֆ օփեն» թենիսի մրցաշարի առաջին փուլում, որը տեղի էր ունենում Ֆլորիդայի Ինդիան Ուելս քաղաքում: Մրցաշարն ավարտվում է այս շաբաթ:

Սարգսյանը 4-6, 7-6 (5), 4-6 հաշվով զիջեց Խուան Կառլոս Ֆերերոյին (7-րդ տեղ), իսկ Նալբանդյանը՝ 6-4, 4-6, 5-7 հաշվով արգենտինացի Խուան Իգնասիո Չելային (50-րդ տեղ):

Անցյալ շաբաթ Սարգսյանը պարտություն էր կրել Դելրեյ Բիչի (Ֆլորիդա) մրցաշարի երկրորդ փուլում:

Առաջին փուլում երկրորդ համարի տակ ցանված արգենտինացի Գիլյերմո Կորիայի նկատմամբ հաղթանակ տանելով՝ երկրորդ փուլում նա պարտվեց 57-րդ համարի տակ ցանված բելոռուս Վլադիմիր Վոլչկովին՝ 7-5, 4-6, 0-1 (հրաժարում):

Երևանցի Սարգսյանը վաստակեց 6225 դոլար և 3 միավոր: Այժմ ՊԹԱ աղյուսակում նա զբաղեցնում է 34-րդ տեղը:

Երրորդ համարի տակ ցանված արգենտինացի Նալբանդյանը Միջազգային սերիայի «Ֆրանքլին Թեմփլթոն» մրցաշարի քառորդ եզրափակիչում 6-0, 3-6, 4-6 հաշվով տանուլ տվեց ավստրալացի Մարկ Ֆիլիպուսիսին:

Այժմ ՊԹԱ աղյուսակում Նալբանդյանը զբաղեցնում է 14-րդ տեղը:

Ե՛վ Սարգսյանը, և՛ Նալբանդյանն աղյուսակում նահանջել են մեկ կետով: Իսկ Անդրե Ագասին՝ չնայած «Ֆրանքլին Թեմփլթոն» մրցաշարի առաջին փուլում կրած պարտությանը, շարունակում է 235 միավորով գլխավորել ՊԹԱ աղյուսակը: