Երևանի Բաղրամյան պողոտայի վրա գտնվող շենքերից մեկի բնակիչները մտահոգված են, որ շենքի վրա «Արմենտելի» տեղադրած արբանյակային ափսեները կարող են վնասակար լինել իրենց առողջության համար:

Հեռախոսային ընկերությունը վերջերս բարձր հզորության երեք անտենա է տեղադրել շենքի տանիքին՝ բջջային հեռախոսակապի որակը բարելավելու համար:

Սակայն Բաղրամյան 25 հասցեում գտնվող 16-հարկանի շենքի 200 բնակիչներին իրենց առողջությանը սպառնացող վտանգն ավելի է մտահոգում, քան բարձրորակ կապը:

Շենքի լիազոր Գայանե Մկրտչյանը հայտնում է, որ նոյեմբերին գնվել է վերջին հարկում գտնվող համար 63 բնակարանը, և այնտեղ վերանորոգման աշխատանքներ են սկսվել:

Սեփականաշնորհված շենքի բնակիչները մեկ շաբաթ առաջ հնարավորություն ստացան տեսնել վերանորոգված բնակարանը, որն իրենից ներկայացնում էր առանց պատուհանների ու դռների մի տարածք, որի պատերը հաստացված էին քարի շարվածքի մի քանի շերտերով: Բնակիչներն ասում են, որ այդ տարօրինակ բունկերն այնքան ծանր է, որ կարող է վնասել շենքի կոնստրուկցիան:

Սակայն բնակիչներին ամենից շատ անհանգստացնում է վախն անտեսանելիի նկատմամբ:

Բնակիչներից մեկը՝ տիկին Մերին, ասում է, որ իրեն անհանգստացնում են անտենաների ճառագած ռադիոակտիվ մասնիկները:

«Դա անհոտ, անտես, անգույն մահ է, որն ազդում է ժամանակի ընթացքում՝ տարիներ անց», - ասում է նա:

Բնակիչների մտահոգությունը կիսում է Երևանի Ռադիոֆիզիկայի գիտահետազոտական ինստիտուտի փոխտնօրեն, գիտությունների դոկտոր, Բնապահպանության և կենսագործունեության անվտանգության միջազգային ակադեմիայի ակադեմիկոս Սուրեն Մարտիրոսյանը:

Նա ասում է, որ նման անտենաները, որոնք միացվում են հատուկ գեներատորների և ճառագում են մեծ հզորության կարճալիք ազդանշաններ, չի կարելի տեղադրել բնակելի շենքերի վրա:

Բնակիչները նաև պնդում են, որ «Արմենտելի» սարքավորումները ժամկետանց են (դրանց օգտագործման ժամկետը լրացել է ավելի քան մեկ տարի առաջ), իսկ ներկայացված վկայականը հայերեն չէ, ինչը Հայաստանի օրենսդրության խախտում է:

«Կան երկրներ, որոնց հետ վկայականների փոխճանաչման պայմանագիր ունենք, սակայն միևնույն է, այդ վկայականները պետք է հաստատվեն Հայաստանում, - ասում է ՀՀ կապի և տրանսպորտի նախարարության տեսչական և լիցենզավորման վարչության պետ Հայկանդուխտ Բարոյանը, - Իսկ եթե վկայականի ժամկետն անցել է, օրինականության մասին ուղղակի խոսքի չի կարող լինել»:

Իր հերթին, «Արմենտելի» ներկայացուցիչ Հասմիկ Չութիլյանն անհիմն է համարում բնակիչների վախը՝ ասելով, որ «ժողովուրդն անտեղի է խուճապի մատնվում»:

Համար 25 շենքի բնակիչները դիմել են առողջապահության նախարարություն, որպեսզի վերջինս եզրակացություն ներկայացնի՝ արդյոք ափսեները սպառնում են իրենց առողջությանը: Վաղը՝ մարտի 15-ին, պետք է նիստ հրավիրվի, որը և պետք է որոշում ընդունի:

Սակայն եթե անգամ նախարարության մասնագետները որոշեն, որ անտենաները վտանգ չեն ներկայացնում, շենքի բնակիչներն ասում են, որ չեն համակերպվի «Արմենտելի» անտենաների տեղադրման հետ:

«Եթե անգամ այդ անտենաները վնասակար չլինեին, լինեին շոկոլադից, միևնույն է, մենք իրավունք ունենք թույլ չտալ դրանց տեղադրումը», - ասում է տիկին Մերին: