Անցյալ շաբաթ երևանցի Նարինե Հարությունյանն ավտոբուսի էր սպասում, որպեսզի գնար աշխատանքի, և նրա մտքով անգամ չէր անցնում, որ այդ ուղևորությունը կարող էր սովորականից տարբերվել:

Սակայն ճանապարհին՝ անվադողի պայթելու հետևանքով, ավտոբուսը կորցրեց ղեկավարումը, և արդյունքում զոհվեցին վարորդն ու հսկիչը, իսկ ևս չորս հոգի տեղափոխվեցին հիվանդանոց: Նարինեն ասում է, որ վարորդը հարվածն իր վրա վերցնելով և զոհաբերելով իրեն՝ փրկեց ուրիշների կյանքը:

Տրանսպորտային մասնագետների հավաստմամբ, նման ավտոբուսային վթարների թիվն աճում է պարզապես ավտոբուսների մաշվածության պատճառով, որոնք շարունակում են շահագործվել, քանի որ փոխարինելու հնարավորություն չկա:

Երևանի ավտոբուսների մեծ մասը շահագործվում է ավելի քան 10 տարի, և այնպիսի փողոցներում, որոնք ավտոբուսների նման մաշված են՝ երկարատև օգտագործման և վերանորոգման միջոցների բացակայության պատճառով:

Այժմ Երևանի փողոցներում իշխում են միկրոավտոբուսները՝ մոտ 2400 հատ: Իսկ խորհրդային տարիներին Երևանի ուղևորներին սպասարկում էին մոտ 500 ավտոբուսներ (չհաշված Էլեկտրատրանսպորտը): Այժմ մնացել են միայն 65-ը: Դուրս գրված ավտոբուսներից շատերն իրենց վերջին հանգրվանն են գտել քաղաքի անկյուններից մեկում գտնվող ժանգոտող գերեզմանոցում:

«Եթե նույնիսկ ֆինանսական այս սուղ պայմաններում միջոցներ հայթայթվեին նոր ավտոբուսների մեծ քանակություն գնելու համար, դա անիմաստ կլիներ, քանի որ այս համակարգը վնասով է աշխատում, - ասում է Երևանի տրանսպորտի վարչության պետ Արեգ Բարսեղյանը, - Հետագայում դրանք պահելու գումար չենք ունենա»: (Ավտոբուսների շահագործման հետ կապված պարտքը ներկայումս կազմում է մոտ 20 հազար դոլար:)

Այդուհանդերձ, հաջողության որոշ անիվներ գլորվելով հասել են Երևան՝ Ֆրանսիայից:

Լիոնի և Երևանի միջև համագործակցության արդյունքում անցյալ շաբաթ մայրաքաղաք են ժամանել «Ռենո» մակնիշի 10 ավտոբուսներ, որոնց շահագործումը կսկսվի շուտով:

Ավտոբուսները նոր չեն, սակայն ոչ էլ այնքան հին են, որքան ներկայումս երթևեկողները: Ավտոբուսները Երևանի համար գնել է Լիոնի հայ համայնքը խորհրդանշական գնով՝ յուրաքանչյուրը 1500 եվրո (մոտ1360 դոլար):

Ըստ Բարսեղյանի, չնայած այդ ավտոբուսները «դուրս գրված» են, դրանք բարվոք վիճակում են և մինչև Երևան բերվելն անցել են տեխնիկական անվտանգության զննում և կապիտալ վերանորոգվել են:

10 ավտոբուսը (յուրաքանչյուրն ունի 29 նստատեղ և կանգնելու լրացուցիչ տարածք) այն քանակը չէ, որ զգալի ազդեցություն ունենա 2400 միկրոավտոբուսների անկանոն երթևեկության վրա, սակայն Բարսեղյանն ասում է, որ դրանք գոնե «քաղաքակիրթ» սպասարկման ինչ-որ հնարավորություն կստեղծեն:

Երևանի և Լիոնի միջև կնքված պայմանագիրը նախատեսում է մինչև տարեվերջ մայրաքաղաք բերել ևս 30 նման ավտոբուս:

Բարսեղյանն ասում է, որ թեև ֆրանսիական ավտոբուսները ժամանակի հետ բախվելու են նույն խնդիրների հետ, ինչ այժմ շահագործվողները, «մենք պետք է ուրախ լինենք նրանց, քանի որ շուրջ 15 տարի ավտոբուս չենք ստացել»:

Նա ավելացրեց, որ Երևանի մոտ 13000 բնակիչներ քաղաքային տրանսպորտից անվճար օգտվելու արտոնություն ունեն, և նրանց համար «այս տարբերակը փրկություն է»: