ՊԹԱ մրցաշարի հերթական շաբաթը հայազգի թենիսիստներին բերեց ինչպես հաջողություններ, այնպես էլ անհաջողություններ:

Ամերիկահայ Անդրե Ագասին Միջազգային սերիայի «Ֆրանքլին Թեմփլթոն» մրցաշարի առաջին փուլում պարտվեց շվեդ Թոմաս Էնկվիստին՝ 7-6 (6), 4-6, 1-6:

Ագասին, որն այս տարի տարել էր 12 հաղթանակ և ոչ մ ի պարտություն չէր կրել, իր պրոֆեսիոնալ կարիերայի ընթացքում հանդիպել էր Էնկվիստի հետ 8 անգամ և միշտ հաղթել էր նրան: Այս անգամ համար 1 թենիսիստը զիջեց համար 100 թենիսիստին:

Արգենտինահայ Դավիթ Նալբանդյանը, որը ցանված է 3-րդ համարի տակ, շարունակում է իր ելույթները ՊԹԱ մրցաշարում:

Խաղալով կոշտ ծածկույթի վրա Սքոթսդեյլում (Արիզոնայի նահանգ)՝ նա առաջին փուլում հաղթեց իր համերկրացի Ագուստին Կալյերիին (15-րդ տեղ)՝ 7-6, 6-3, և հաջորդ փուլում մրցելու է մեկ այլ արգենտինացու՝ Ֆրանկո Սկուիլարիի հետ (74-րդ տեղ):

Երևանցի Սարգիս Սարգսյանը Ֆլորիդա նահանգի Դելրեյ Բիչի մրցաշարի առաջին փուլում հաղթանակ տարավ 2-րդ համարի տակ ցանված արգենտինացի Գիլյերմո Կորիայի նկատմամբ՝ 7-5, 6-2:

Երկրորդ փուլում Սարգսյանը խաղալու է Վլադիմիր Վոլչկովի հետ Բելառուսից (57-րդ տեղ):