Թենիս

(Պրոֆեսիոնալ թենիսիստների ասոցիացիայի առաջնություն)

Անդրե Ագասիի հաղթանակը Ավստրալիայի բաց առաջնությունում թույլ տվեց նրան 200 միավորով գլխավորել ՊԹԱ նոր մեկնարկած առաջնության աղյուսակը և վաստակել 657000 դոլար:

Մրցաշարը նաև բարելավեց նվազ հայտնի Դավիթ Նալբանդյանի (Արգենտինա) դիրքերը, որն այժմ 51 միավորով զբաղեցնում է 9-րդ տեղը և վաստակել է 82000 դոլար:

Իսկ երևանցի Սարգիս Սարգսյանը՝ հասնելով 1/8 եզրափակիչ, ցատկ կատարեց 31-րդ տեղից 18-րդը: Այսօրվա դրությամբ Սարգսյանը վաստակել է 38 միավոր և 41000 դոլար:

(Կանանց թենիսի ասոցիացիայի առաջնություն)

ԿԹԱ առաջնությունում բուլղարահայ Մագդալենա Մալեևան դուրս եկավ Ավստրալիայի բաց առաջնության երրորդ փուլ, որտեղ տանուլ տվեց ռուսաստանցի Ելենա Բովինային՝ 5-7, 6-4, 5-7: Այժմ ԿԹԱ աղյուսակում Մալեևան զբաղեցնում է 14-րդ հորիզոնականը:

Ավստրալիայի բաց առաջնության առաջին փուլում կրած պարտությունից հետո Մարի-Գայանե Միքայելյանը Շվեյցարիայից շարունակում է մնալ 36-րդ տեղում:

Գեղասահք (Եվրոպայի առաջնություն 2003)

Անցյալ կիրակի Շվեդիայի Մալմյո քաղաքում ավարտվեց Եվրոպայի գեղասահքի առաջնությունը:

Հայաստանի միակ ներկայացուցիչ Արամայիս Գրիգորյանը տղամարդկանց մենասահքում 30 մասնակիցների մեջ գրավեց վերջին տեղը: Կարճ ծրագրում վերջին տեղը գրավելուց հետո Գրիգորյանը որոշեց չմասնակցել Ազատ ծրագրին: