Փետրվարի 19-ի նախագահական ընտրություններին մասնակցող թեկնածուները, համաձայն օրենքի, Կենտրոնական ընտրական հանձնաժողով են ներկայացրել իրենց ֆինանսական հայտարարագրերը:

Թեև շարքային քաղաքացիների մեծ մասը կասկածանքով է վերաբերվում դրանց ճշտությանը, այս ձևականությունն ամեն դեպքում ցույց է տալիս եկամուտների ակնհայտ տարբերություն:

Ցուցակը գլխավորում է նախկին վարչապետ 42-ամյա Արամ Սարգսյանը, որը հայտարարագրել է 206301304 դրամ (մոտ 352650 դոլար) տարեկան եկամուտ, իսկ «Հայրենիք և պատիվ» կուսակցության թեկնածու 58-ամյա Գառնիկ Մարգարյանը՝ ընդամենը 418 դոլար:

Ըստ ՀՀ Ընտրական օրենքի, թեկնածուները պետք է հայտարարագրեն իրենց ունեցվածքն ու տարեկան եկամուտը՝ որպես թեկնածության առաջադրման պայմաններից մեկը:

Ե՛վ Սարգսյանը, և՛ Մարգարյանը հայտարարել են, որ իրենք բացի ավտոմեքենաներից այլ ունեցվածք չունեն: Սարգսյանն ունի «Ջիփ Ռանգլեր» մակնիշի մեքենա, իսկ Մարգարյանը, որ նշել է, որ ինքը «թոշակառու» է, ունի «Մերսեդես Բենց 190»:

Միայն Վլադիմիր Դարբինյանն ու Վազգեն Մանուկյանն են ունեցվածք հայտարարագրել: (Որոշ թեկնածուներ անշարժ գույքի հայտարարագրման սյունակում գծիկ են դրել, իսկ մյուսները պարզապես անտեսել են այդ սյունակը:)

Հիսունյոթամյա Մանուկյանը որպես ունեցվածք նշել է 107 քմ տարածք ունեցող տուն, 180 քմ հողամաս և «Նիվա» մակնիշի ավտոմեքենա:

Ազգային ժողովրդավարական միության նախագահ Մանուկյանը նշել է, որ իր ընտանիքը վաստակել է 5456026 դրամ (մոտ 9300 դոլար), որի կեսից ավելին՝ 5600 դոլարը, նրա դստեր՝ Աստղիկի, եկամուտն է:

Կոմունիստական կուսակցության առաջնորդ 72-ամյա Վլադիմիր Դարբինյանը հայտարարգրել է 2565 դոլար եկամուտ և 131 քմ տարածք ունեցող բնակարան:

Քառասունչորսամյա Ստեփան Դեմիրճյանը, որին քաղաքական դիտորդները համարում են ընտրարշավի հավանական հաղթող նախագահ Ռոբերտ Քոչարյանի ամենալուրջ մրցակիցը, հայտարարագրել է 9925 դոլարի եկամուտ, որից 3891 դոլարը նրա աշխատավարձն է ավտոմատացված համակարգեր արտադրող «Մարս» գործարանում, իսկ մնացած 6034 դոլարը վաստակել են նրա մայրը և կինը:

Քառասունիննամյա Քոչարյանը նշել է, որ չունի ոչ ունեցվածք, և ոչ էլ մեքենա, և որ իր ընտանիքը՝ ներառյալ որդին՝ Սեդրակը, և դուստրը՝ Գայանեն, 2002 թվականին վաստակել է 17160 դոլար:

Ամենաերիտասարդ թեկնածու, «Հեռանկար» կենտրոնի 39-ամյա ղեկավար Արամ Կարապետյանը հայտարարագրել է 34355 դոլար:

«Իրավունք և միաբանություն» խորհրդարանական կոալիցիայի ղեկավար, 54-ամյա Արտաշես Գեղամյանը հայտարարագրել է 3731 դոլար:

Նոր մոսկովյան իրավաբանական համալսարանի Հայաստանի մասնաճյուղի տնօրեն Ռուբեն Ավագյանը հայտարարագրել է 23769 դոլար որպես իր, իր կնոջ և իր որդու ընդհանուր եկամուտ:

Երևանի պետական համալսարանի 44-ամյա ասիստենտ Արամ Հարությունյանը հայտարարագրել է 776 դոլար:

Մյուս Արամ Սարգսյանը՝ Ժողովրդավարական կուսակցության 57-ամյա առաջնորդը, հայտարարագրել է 3709 դոլարի եկամուտ:

Պաշտոնական ընտրարշավը սկսվել է հունվարի 21-ին և կավարտվի փետրվարի 17-ին:

 

Գառնիկ	Մարգարյան	244 307	$418
Արամ	Հարությունյան	454 155	$776
Վլադիմիր	Դարբինյան	1 500 000	$2 564
Արամ	Սարգսյան	2 170 000	$3 709
Արտաշես	Գեղամյան	2 182 889	$3 731
Վազգեն	Մանուկյան	5 456 026	$9 327
Ստեփան	Դեմիրճյան	5 806 322	$9 925
Ռոբերտ	Քոչարյան	10 038 458	$17 160
Ռուբեն	Ավագյան	13 904 994	$23 769
Արամ	Կարապետյան	20 097 400	$34 355
Արամ	Սարգսյան	206 301 304	$352 652