Թենիս (Ավստրալիայի բաց առաջնություն)

Ավստրալիայի բաց առաջնությանը մասնակցում էին հայկական ծագում ունեցող հինգ թենիսիստներ: Նրանցից մնացել է Անդրե Ագասին (ԱՄՆ): Երեկ նա հաղթեց Ուեյն Ֆերեյրային (6-2, 6-2, 6-3) և դուրս եկավ եզրափակիչ:

Դավիթ Նալբանդյանը (Արգենտինա) դուրս եկավ քառորդ-եզրափակիչ, որտեղ զիջեց 31-րդ ցանված Ռայներ Շուտլերին (3-6, 7-5, 1-6, 0-6):

Երևանցի Սարգիս Սարգսյանը ցույց տվեց իր լավագույն արդյունքը Ավստրալիայի բաց առաջնություններում և դուրս գալով 1/8 եզրափակիչ՝ տանուլ տվեց Ուեյն Ֆերեյրային Հարավային Աֆրիկայից (3-6, 4-6, 6-3, 3-6):

Ֆուտբոլ (ԱՊՀ գավաթ 2003)

Իր երկու լավագույն խաղացողներին վաճառելուց և արգենտինացի մարզիչ Օսկար Լոպեսին պաշտոնից ազատելուց հետո՝ «Փյունիկ» ֆուտբոլային ակումբը մասնակցեց Անկախ պետությունների համագործակցության 2003 թվականի գավաթի խաղարկությանը, որն ընթանում է Մոսկվայի «Օլիմպիական» և «Սպարտակ» մարզահամալիրներում:

Հայաստանի բարձրագույն խմբի չեմպիոնները չկարողացան լուրջ դիմադրություն ցույց տալ արտասահմանյան թիմերին:

Խաղալով Բ խմբում (թիմերը բաժանված էին չորս խմբի)՝ «Փյունիկը» 1-2 հաշվով տանուլ տվեց Լատվիայի «Սկոնտոյին» և 1-3 հաշվով՝ «Ռեգար-Թադազին» Տաջիկստանից:

Ժամանակավոր մարզիչ Խորեն Հովհաննիսյանի ղեկավարությամբ հանդես եկող «Փյունիկին» հաջողվեց երրորդ փուլում 1-1 ոչ-ոքի խաղալ «Բատե» թիմի հետ Բելառուսից, որը սակայն չանդրադարձավ աղյուսակում նրա գրաված վերջնական դիրքի վրա:

Ձևավոր չմշկասահք (Եվրոպայի առաջնություն)

Այս շաբաթ Շվեդիայի Մալմյո քաղաքում սկսվել և մինչև կիրակի շարունակվելու է Եվրոպայի չմշկասահքի առաջնությունը:

Հայաստանի միակ մասնակիցը Արամայիս Գրիգորյանն է, որը հանդես կգա տղամարդկանց մենասահքում: