Երեքշաբթի առավոտյան ուղևորին աշխատանքի տանելիս՝ «ՌադիոՏաքսիի» մեքենան մնաց կես ճանապարհին, և վարորդ Արտյոմը ներում խնդրող ժպիտով բացատրեց, որ մեքենայի գազը վերջացել է:

Դա միակ դեպքը չէր, քանի որ ամբողջ շաբաթվա ընթացքում Հայաստանը սկսում էր զգալ անցյալ շաբաթվա վերջում Ռուսաստանում տեղի ունեցած խողովակաշարի վթարի հետևանքով պրոպանի մատակարարման դադարեցման հետևանքները:

Նորմալ պայմաններում օրական ութ միլիոն խորանարդ մետր գազ է մուտք գործում Հայաստան Թուրքմենստանից: Սակայն հիմնական խողովակաշարը շարքից դուրս է եկել Հյուսիսային Օսեթիայում, իսկ պահեստային գիծը վնասվել է սողանքի պատճառով՝ Հայաստանը և Վրաստանը թողնելով առանց գազի:

Արդյունքն ավելի խաղաղ երևանյան փողոցներն էին, բացառությամբ երթուղային տաքսիների սպասող պոտենցիալ ուղևորների բողոքներին: «Մարշրուտկաների» մեծ մասն աշխատում է պրոպանով (ինչպես և շատ մեքենաներ ու բեռնատարներ), իսկ գազի բացակայության պատճառով խիստ կրճատվել է տրանսպորտային հաղորդակցությունը: (Երևանում կան մոտ 70 երթուղիներով աշխատող շուրջ 2000 միկրոավտոբուսներ):

Իշխանությունների հավաստմամբ, Հայաստանը գազի բավարար պահուստներ ունի ևս մի քանի օր օգտագործելու համար, սակայն գազի լցակայանները երկուշաբթի օրվանից փակ են:

«Երևանը սպասարկող երթուղային տաքսիների մոտ 95 տոկոսն աշխատում է բնական գազով», - ասում է Երևանի Տրանսպորտի վարչության պետ Արեգ Բարսեղյանը:

Ըստ Բարսեղյանի, չորեքշաբթի օրն աշխատում էին երթուղային տաքսիների մոտ կեսը: Արդյունքը երկար հերթերն ու ուղևորներով ծանրաբեռնված ավտոբուսներն են:

«Այսօր երթուղային տաքսիում մոտ 30 հոգի կար (նորմալը 12 հոգի է), - ասում է Գայանե Ավետյանը, որն աշխատանքի գնում է երթուղային տաքսիով, - Ամեն րոպե ստիպված էինք կանգ առնել, որպեսզի մեկը իջներ կամ նստեր»:

Ավետյանն ասում է, որ մարդաշատ միկրոավտոբուսը, որով նա գնում էր, ինչ-որ անսարքություն ուներ:

«Կամ անընդհատ կանգառների, կամ էլ չափազանց ծանրաբեռնվածության պատճառով արգելակները խափանվեցին: Սարսափելի էր, երբ մեքենան առանց արգելակների ցած էր իջնում Մասիվից»:

Որոշ երթուղային տաքսիների վարորդներ՝ օգտվելով ստեղծված իրավիճակից, բարձրացրել էին երթավճարը:

«Ինձնից պահանջեցին վճարել սովորականից երկու անգամ շատ, - ասում է Վերա Մինասյանը, - Վարորդը դա բացատրեց վառելիքի ավելի բարձր գնով»:

Բարսեղյանի հավաստմամբ, վարորդներին պաշտոնապես թույլ չի տրվել բարձրացնել երթավճարը:

«Ես անձամբ բողոքներ եմ ստացել այդ կապակցությամբ, - ասում է Բարսեղյանը, - Վճարի բարձրացումն օրինական չէ, և մենք միջոցներ ենք ձեռնարկում դրա դեմ»:

Երեկ՝ հունվարի 23-ին, Ռուսաստանի նախագահ Վլադիմիր Պուտինն անձամբ կարգադրություն արեց «մեկ օրվա ընթացքում» ավարտել վնասված խողովակաշարի նորոգումը: