Հեռուստալրագրող Տիգրան Նաղդալյանի սպանության առթիվ բանավեճը քաղաքական կրքեր բորբոքեց այն բանից հետո, երբ սպանված վարչապետ Վազգեն Սարգսյանի շահերը ներկայացնող փաստաբանը կարծիք հայտնեց, որ Նաղդալյանի սպանությունը կապված է 1999 թվականի հոկտեմբերի 27-ի խորհրդարանական սպանությունների ընթացող դատավարության հետ:

Ճանաչված լրագրող և Հանրային հեռուստատեսության խորհրդի նախագահ Նաղդալյանը սպանվել է դեկտեմբերի 28-ին ծնողների տնից դուրս գալիս:

Նաղդալյանին այդ պաշտոնին էր նշանակել նախագահ Ռոբերտ Քոչարյանը: Նա նախագահի առանցքային կողմնակիցներից էր և հաճախ քննադատում էր ընդդիմությանն ամեն շաբաթ եթեր դուրս եկող իր «Օրակարգ» հեռուստածրագրում:

Նաղդալյանի մահվանն անմիջապես հաջորդած իր հայտարարության մեջ Քոչարյանը սպանության մեջ մեղադրեց ընդդիմադիր ուժերին:

Սակայն մոսկվացի փաստաբան Օլեգ Յունոշևի հայտարարությունները հունվարի 14-ին կայացած մամլո ասուլիսում կապում են Նաղդալյանի սպանությունը հոկտեմբերի 27-ի ահաբեկչության մասին լրագրողի ունեցած տեղեկությունների և հնարավոր մեղսակցության հետ:

Նաղդալյանին պետք է հրավիրեին վկայություն տալու, և Յունոշևը պնդում է, որ եթե նա արդեն վկայություն տված լիներ, ապա հիմա ողջ կլիներ: Ընդդիմության ներկայացուցիչները պնդում են, որ Նաղդալյանին սպանել են, որպեսզի նա չտա վկայություններ, որոնք կարող էին ցույց տալ նախագահի առնչությունը հոկտեմբերի 27-ին:

Իր մեղադրանքներում Յունոշևը հիմնվում է, մասնավորապես, իր այն ենթադրության վրա, որ Նաղդալյանը մոնտաժել է խորհրդարանում տեղի ունեցած ահաբեկչության մասին հանրային հեռուստատեսությամբ ցուցադրված տեսերիզը:

Խորհրդարանում նկարահանված տեսերիզն իրականում 11 րոպեով երկար է հանրության տեսած տարբերակից:

Զինվորական դատախազ Գագիկ Ջհանգիրյանը չի ժխտում, որ գոյություն ունեն Ազգային Ժողովի շենքում հոկտեմբերի 27-ին տեղի ունեցած իրադարձությունները պատկերող երկու բնօրինակ տեսերիզներ:

«Նոյեմբերի 1-ին մեզ մոտ կար մեկ տեսերիզ, - «Հ1»-ին տված հարցազրույցում պարզաբանել է Ջհանգիրյանը, - Հետագայում պարզվեց, որ առկա է ևս մեկը, և մենք այն առգրավեցինք»:

Յունոշևն ասում է, որ 1999 թվականի հոկտեմբերի 27-ից 31-ը Նաղդալյանը թույլ է տվել մոնտաժել տեսերիզը և դատախազությանն է տրամադրել միայն մոնտաժված տարբերակը, և որ միայն այդ երկու տեսերիզների համեմատությունը կբացահայտի ամբողջ կատարվածը: Յունոշևը պնդում է, որ Նաղդալյանը հրահանգ է ստացել մոնտաժել տեսերիզը:

Փաստաբանը նաև այլ սենսացիոն հայտարարություններ արեց՝ ավելացնելով, որ իր տրամադրության տակ կա հոկտեմբերի 27-ի իրադարձությունների նոր տեսերիզ, որը ցույց է տալիս, որ Ազգային Ժողովի դահլիճի հարևանությամբ եղել են զինված մարդիկ, որոնք մեղադրվող Նաիրի Հունանյանի ահաբեկչական խմբի անդամներ չեն ճանաչվել:

Յունոշևը հայտարարում է, որ ունի վկաներ, ովքեր պատրաստ են դատարանում հայտարարել, որ խորհրդարանական ահաբեկչության կազմակերպիչները բարձրաստիճան պաշտոնյաներ են, և նա այդ վկաներին հրավիրելու է դատարան՝ վկայություն տալու:

«Տիգրան Նաղդալյանը հոկտեմբերի 27-ի հետ կապված առաջին զոհը չէ, - ասաց փաստաբանը, - Հիշենք այդ գործով մեղադրվողներից մեկի մահը մեկուսարանում: Մենք տվյալներ ունենք, որ ևս հինգ անձինք, ովքեր այս կամ այն կերպ առնչվում էին գործին և կարող էին տեղեկություններ հայտնել մի շարք բարձրաստիճան պաշտոնյաների հանցակցության մասին, սպանված են: Այդ պաշտոնյաների անուններն առաջիկայում կհրապարակվեն դատարանում»:

Նախկինում Վազգեն Սարգսյանի իրավահաջորդների շահերը ներկայացնող փաստաբան Մարինա Ջանոյանը կիսում է այն տեսակետը, որ ողջ լինելու դեպքում Նաղդալյանը կարող էր լույս սփռել հոկտեմբերի 27-ի գործի վրա:

«Նաղդալյանը տեսագրությունների բնօրինակը պետք է հանձներ նախաքննության մարմնին, որը չի արել, թեև մենք դատարանում նման հարցադրում արել էինք, - ասում է Ջանոյանը, - Մինչև այսօր գործի մասնակիցները չեն կարողացել դիտել բնօրինակը, թեև բոլորը գիտեն, որ այն գտնվում է Նաղդալյանի մոտ»:

Սակայն թեև Ջանոյանը կարծում է, որ Նաղդալյանը կարող էր չափազանց կարևոր վկայություններ տալ, նա չի կարծում, որ Նաղդալյանն այդպես կաներ:

«Տիգրան Նաղդալյանը շատ խելացի և պատրաստված երիտասարդ էր, - ասում է փաստաբանը, - Ես զարմանում եմ այն մարդկանց վրա, որոնք կարծում են, որ Նաղդալյանը կգար դատարան և կասեր այն, ինչ տեղի է ունեցել իրականում, կամ այն, ինչ իրենք են ուզում լսել»:

Հոկտեմբերի 27-ի դատավարությունը հետաձգվել է անցյալ ուրբաթ օրվանից դատավոր Սամվել Ուզունյանի հիվանդության պատճառով: Հայտնի չէ, թե այն երբ կվերսկսվի:

Դատավորի հիվանդանալու ժամանակը նույնպես օգտագործվում է ընդդիմության կողմից, որը փորձում է կասկածներ հարուցել դատարանում կատարվելիք հայտարարությունների կապակցությամբ:

«Ինչու՞ հանկարծ հիվանդացավ Ուզունյանը», - հարցնում է «Հանրապետություն» կուսակցության լրատվական ծառայության ղեկավար Սուրեն Սուրենյանցը, որի կանխատեսմամբ դատավարությունը կշարունակվի միայն փետրվարի 19-ից հետո:

Նախագահ Քոչարյանը, որի քարոզարշավը (ինչպես և ընդդիմության քարոզարշավը) պաշտոնապես սկսվեց երեքշաբթի օրը, արձագանքեց Յունոշևի հայտարարություններին՝ փաստաբանին անվանելով «փաստաբանի փաստաթղթերով «բոմժ»»:

Յունոշևը պատասխանեց նախագահի հայտարարությանը՝ ընդգծելով, որ անցյալում Ռուսաստանում աշխատել է որպես դատախազ և արժանացել է Ռուսաստանի գլխավոր դատախազի բարձր գնահատականին:

Նախագահը նաև ասել է, որ Յունոշևի հայտարարությունները կապված են (Վազգեն Սարգսյանի եղբայր) նախկին վարչապետ Արամ Սարգսյանի նախագահական նախընտրական քարոզարշավի հետ:

«Դիակներով ընտրությունների չեն գնում», - հայտարարել է Քոչարյանը:

Արագածոտնի մարզում չորեքշաբթի օրն անցած նախընտրական հավաքի ժամանակ Արամ Սարգսյանը պատասխանել է նրան. - «Նա (Քոչարյանը) ինքն է դիակների վրայով իշխանության եկել: Ուրիշ ի՞նչ կարելի է սպասել այդ մարդուց»: