Ֆուտբոլ (Օսկար Լոպես)

Ըստ «Կոմանդա» թերթի, Օսկար Լոպեսն այլևս չի հանդիսանում ոչ «Փյունիկ» ակումբի, ոչ էլ Հայաստանի ազգային հավաքականի մարզիչը և վերադարձել է հայրենիք՝ Արգենտինա:

Թերթը հայտնում է, որ Հայաստանի ֆուտբոլի ֆեդերացիայից ստացված տեղեկությունների համաձայն, Լոպեսը խնդրել է կրկնապատկել իր աշխատավարձը, և երբ նրա խնդրանքը չի բավարարվել, մեկնել է:

«Փյունիկի» մարզչի պաշտոնը ժամանակավորապես զբաղեցնում է ակումբի նախագահ և ԽՍՀՄ հավաքականի նախկին խաղացող Խորեն Հովհաննիսյանը:

Թենիս (ՊԹԱ/ԿԹԱ առաջնություններ)

Երկուշաբթի օրը՝ հունվարի 13-ին, Մելբուռնում մեկնարկեց Մեծ սաղավարտի չորս մրցաշարերից մեկը՝ Ավստրալիայի բաց առաջնությունը:

Կոշտ մակերեսի վրա մրցապայքարի են դուրս եկել 128 տղամարդ և 128 կին թենիսիստներ: Նրանց թվում է երևանցի Սարգիս Սարգսյանը:

Ներկայումս ՊԹԱ աղյուսակում 31-րդ տեղում գտնվող Սարգսյանը դուրս է եկել երրորդ փուլ՝ առաջին փուլում հաղթելով Ագուստին Կալիերիին (4-6, 6-3, 7-6, 6-0), իսկ երկրորդում՝ Գաստոն Գաուդիոյին (2-6, 7-5, 6-2, 6-2):

Իսկ այսօր՝ հունվարի 17-ին, Սարգսյանն անցավ հաջորդ փուլ՝ պարտության մատնելով Մարկ Ֆիլիպուսիսին (5-7, 7-5, 6-0, 6-4):

Արգենտինացի Դավիթ Նալբանդյանը (82-րդ տեղ) նույնպես հասել է երրորդ փուլ՝ հաղթանակներ տանելով Ժերոմ Գոլմարի (3-6, 6-3, 6-1, հրաժարում) և Ջեյմոն Քրաբի նկատմամբ (6-1, 7-6, 6-3):

Հայկական ծագումով մեկ այլ թենիսիստ՝ Մարի-Գայանե Միքայելյանը Շվեյցարիայից, առաջին փուլում տանուլ տվեց Էմանուել Գալիարդիին (1-6, 0-2, հրաժարում):

Այս խաղաշրջանում Հայաստանը նույնպես իր ներկայացուցիչն ունի Կանանց թենիսի ասոցիացիայում (ԿԹԱ): Լյուդմիլա Նիկոյանը ներկայումս գրավում է 1043-րդ տեղը: