Ցուրտ անձրևոտ օրը Երևանի կենդանաբանական այգում քիչ այցելուներ կան: Տնօրենն ասում է, որ վերջին երկու շաբաթվա ընթացքում նրանց թիվը չի անցել տասնյակից:

«Ցավալի է, որ ձմռանը քիչ մարդ է գալիս, - ասում է տնօրեն Սահակ Աբովյանը, - Այգին մարդկանցով է գեղեցիկ»:

Սակայն լիքը, թե դատարկ, այստեղ կան մոտ 200 տեսակի կենդանիներ, որոնց պետք է խնամել, իսկ Երևանի դաժան ձմեռն ավելի է դժվարացնում այդ խնդիրը:

«Ձմռանը դժվարությունները շատ-շատ են, - ասում է Գիշատիչների բաժնի ղեկավար Յունոնա Խանզադյանը, - Տարածքը մաքրվել է ձյունից, աղ է լցվել, բայց միևնույն է, վանդակներում ջուրը սառչում է»:

Ամեն օր թասերի մեջ եռացրած ջուր են լցնում, որպեսզի տաքացնեն կենդանիների խմելու ջուրը: Աբովյանն ասում է, որ աշխատողները վիճում են, թե տաքացված ջուրն առաջինը որ կենդանուն պետք է տրվի:

Որոշ կենդանիներ, ինչպես կապիկները և արջերը, իրենց վանդակներում ձմեռանոցներ ունեն:

Արջերը հատուկ ուշադրության են արժանանում ձմռանը, քանի որ էգերը հղի են լինում այս ամիսներին:

Խանզադյանն ասում է, որ մի արջ քոթոթ է բերել, սակայն նույնիսկ աշխատողները նրան դեռ չեն տեսել, «միայն ձայնն են լսել»:

Ձմեռն ընկնելուն պես կապիկներին փակում են իրենց ձմեռանոցներում: Ամբողջ ձմեռ նրանց սնունդը նույնն է, սնվում են մարդկանց պես՝ միրգ, բանջարեղեն, թեյ, կաթ, քաղցրավենիք:

«Ցիտրուսներ կարող ենք մտցնել նրանց կերի ցուցակի մեջ, և հավատացնում եմ, որ գոնե ամիսը մեկ անգամ կարող ենք տալ, պարզապես դրանք անհրաժեշտ կալորիականությունը չունեն, - ասում է Խանզադյանը, - Բոլորին թվում է, որ եթե կապիկին մանդարին տան, նա դրանով կկշտանա»:

Ջերմասեր կենդանիների համար վանդակների հատակին տախտակներ են դնում, վրան խոտ լցնում և ամեն օր փոխում, որ թաց չլինի:

«Կարևոր պրոբլեմ է որոշ կենդանիների նորմալ ազատավանդակ չունենալը, - ասաց Աբովյանը, - Մեծ կատվազգիների ազատավանդակները չեն համապատասխանում նրանց նորմերին: Կցանկանայինք, որ այդ ազատավանդակներն ավելի մեծ լինեին՝ տվյալ կենդանուն համապատասխան, որպեսզի այն իրեն բանտում չզգար: Սակայն դա ֆինանսական լուրջ միջոցների հետ է կապված»:

Կատվազգիների համար վանդկաներում ծածկեր են սարքում, գետնին խոտ են լցնում: Ձմռանը նրանք հիմնականում ապրում են իրենց էներգիայի հաշվին, այդ պատճառով տարվա այս եղանակին նրանց սննդաբաժինն ավելացվում է:

Բոլոր երևանցիների նման, կենդանիներն էլ են ձմռանը մրսում: Սակայն չնայած այս ձմեռվա ծայրահեղ սառնամանիքներին՝ Խանզադյանի հավաստմամբ, ցրտից ոչ մի կենդանի չի սատկել:

«Զարմանում եմ, երբ ասում են. - «Կենդանաբանական այգին փակ է, բա դուք ինչու՞ եք աշխատում»: Մենք աշխատում ենք մեզ համար հարազատ դարձած կենդանիների համար: Մեզ շատ բան է կապում նրանց: Ով չի սիրում կենդանիներին, այստեղ երկար ժամանակ աշխատել չի կարող», - ասում է Խանզադյանը: