Երբ Ազգային Ժողովը դեկտեմբերի 26-ին հաստատեց 2003 թվականի պետական բյուջեն, ծախսերին այն հատկացրեց 334 միլիարդ դրամ (մոտ 570 միլիոն դոլար): Այդ գումարի մոտ 30 տոկոսն ակնկալվում է այլ երկրներից ստացվելիք վարկերի և փոխանցումների (տրանսֆերների) տեսքով:

Այդ վարկերը կծախսվեն առաջնային համարված այնպիսի ծրագրերի վրա, ինչպես տրանսպորտը, բնակարանային տնտեսությունը, էլեկտրաէներգիայի և ջրային ռեսուրսները, գյուղատնտեսությունն ու մշակույթը:

«90-ականների կեսերից Հայաստանը սկսել է վճարել իր արտաքին պարտքը», - ասում է Ֆինանսների և էկոնոմիկայի նախարարության բյուջետային գործընթացի կառավարման վարչության պետ Դավիթ Համբարձումյանը:

Գլխավոր վարկատուն Համաշխարհային բանկն է, որը տրամադրում է վարկեր 0,75 տոկոս տարեկան տոկոսադրույքով 20-25 տարի վճարման ժամկետով:

Այսօրվա դրությամբ Հայաստանն ունի 781 միլիոն դոլար արտաքին պարտք, որն ուղղվել է բյուջեի ճեղքվածքը փակելուն: Այս տարի արտաքին վարկերի տոկոսները վճարելու համար հատկացվել է 6 միլիարդ դրամ (10 միլիոն դոլար):

Ազգային պաշտպանությունն ու անվտանգությունը ստանում են բյուջեի մեծ մասը՝ 19 տոկոսը, որը կազմում է 65 միլիարդ դրամ (111 միլիոն դոլար):

Սոցիալական ծրագրերը՝ կրթությունը, առողջապահությունը և սոցիալական ապահովությունը, միասին կստանան 26 տոկոս: Կրթության և գիտության վրա կծախսվի մոտ 35 միլիարդ դրամ (59 միլիոն դոլար): Սոցիալական ապահովությունը կստանա 31 միլիարդ դրամ (52 միլիոն դոլար), իսկ առողջապահության վրա կծախսվի 21 միլիարդ դրամից (36 միլիոն դոլար) քիչ ավելի:

Ըստ Համբարձումյանի, այս տարի Հայաստանն ավելի շատ գումար կծախսի առողջապահության և կրթության վրա, քան նախորդ տարիներին:

Մասնավորապես 2003 թվականին առողջապահության բյուջեն ավելացել է 4,8 միլիարդ դրամով (8,2 միլիոն դոլար), որն ուղղվելու է բժշկական սպասարկման որակի բարելավմանը:

Շուրջ 34 միլիարդ դրամ (58 միլիոն դոլար) կտրամադրվի բնակարանային տնտեսությանն ու կոմունալ ծառայություններին, իսկ տրանսպորտն ու հաղորդակցության միջոցները կստանան 37 միլիարդ դրամ (63 միլիոն դոլար):

Կառավարությունը նաև 9 միլիարդ դրամ (15 միլիոն դոլար) կհատկացնի տեղական ինքնակառավարման մարմինների բյուջեներին՝ միջկառավարական փոխանցումների (տրանսֆերների) տեսքով:

Հարյուր հիսուն միլիոն դրամ է հատկացվում (256000 դոլար) կառավարական պաշտոնյաների ճամփորթական ծախսերին: Կառավարությունը բյուջեում նաև հատկացրել է 4 միլիարդ դրամ (6,8 միլիոն դոլար) չնախատեսված ծախսերի համար:

Բոլոր նախատեսված ծախսերով բյուջեի դեֆիցիտը կազմում է 47 միլիարդ դրամ (80 միլիոն դոլար):

Այս տարի ազգային բյուջեի եկամուտները զգալիորեն մեծացել են, որովհետև դրանում պաշտոնապես ընդգրկվել են հաղորդակցության, մշակույթի և բնակարանային շինարարության ոլորտների համար նախատեսված «Լինսի» հիմնադրամի նվիրատվությունները (87 միլիոն դոլար):

Այն քաղաքացիները, ովքեր ցանկանում են ծանոթանալ իրենց վճարած հարկերը ծախսելու մանրամասն ծրագրերին, կարող են 10000 դրամով (մոտ 18 դոլար) ձեռք բերել «Պետական բյուջե» տեղեկագիրքը: