Անցյալ ամիս, երբ ամբողջ հանրապետության առևտրի կենտրոններում հայտնվեցին 20-դրամանոց մետաղադրամները, շատերի ոգևորությունն այնքան մեծ էր, որ սկսեցին նոր մետաղադրամները նվիրել իրենց մտերիմներին:

Տասը-դրամանոց մետաղադրամներն արդեն մի քանի տարի շրջանառության մեջ են, սակայն պղնձագույն 20-դրամանոցները (մոտ 4 սենթ) նորություն են:

«Դեռևս տարիներ առաջ թողարկվեցին մետաղադրամ «լումաները», սակայն սղաճի պատճառով դրանք այնքան արժեզրկվեցին, որ ամբողջովին դուրս մնացին շրջանառությունից, - ասում է ՀՀ Կենտրոնական բանկի էմիսիոն գործառնությունների և դրամական պահուստների վարչության պետ Գևորգ Թումանյանը, - Այսօր, հաշվի առնելով մետաղադրամի որոշ առավելություններ, նորից սկսվել է տարբեր արժեքի և արտաքինի մետաղադրամների թողարկումը»:

Կենտրոնական բանկի աշխատակիցների հավաստմամբ, մետաղադրամների թողարկման ամենակարևոր նախապայմանը դրանց պրակտիկությունն է:

Թումանյանն ասում է, որ ներկայումս շրջանառության մեջ գտնվող 10, 25, 50 և այլ թղթադրամները հիմնականում մաշված և վնասված են, ձեռքից ձեռք են անցնում, բանկային համակարգ չեն մտնում և ամբողջովին շարքից դուրս են գալիս:

«Ի տարբերություն թղթադրամների, մետաղադրամները կարող են օգտագործվել 15 տարուց ավելի, - ասում է Թումանյանը, - Ուստի ավելի նպատակահարմար է մեկ անգամ գումար ծախսել և թողարկել մետաղադրամ, և այս դեպքում խնայողությունը կլինի երկար տարիների համար: Իսկ ամենակարևորն այն է, որ կլուծվի մաշված մանր թղթադրամների խնդիրը»:

Շրջանառության մեջ են մտցվել 30 միլիոն դրամ արժողությամբ (մոտ 51700 դոլար) 20-դրամանոցներ:

Նոր մետաղադրամները թողարկվել են Լեհաստանի դրամահատարանում: Մետաղադրամի չափսը և բաղադրությունը (պղինձ) ընտրվել է՝ հաշվի առնելով որոշ նրբություններ և միջազգային փորձը:

«Մետաղադրամ թողարկելով՝ մենք պարտավոր ենք հաշվի առնել նաև մեր հարևան երկրներում կիրառվող մետաղադրամների պարամետրերը», - ասում է Թումանյանը՝ ավելացնելով, որ ընտրություն կատարելուց առաջ ուսումնասիրվել են 80-100 երկրների մետաղադրամները:

Քսան-դրամանոց մետաղադրամներն առաջինն են այն մետաղադրամների շարքում, որոնք շրջանառության մեջ կդրվեն այս տարի: Դրանց թվում են 50, 100, 200 և 500-դրամանոց մետաղադրամները՝ բոլորն էլ տարբեր մետաղական բաղադրությամբ: 500-դրամանոց մետաղադրամը (մոտ 80 սենթ) կլինի եվրոյի նման՝ մեջտեղը սպիտակ մետաղից, իսկ արտաքինից՝ արույրե դեղին շրջանակ: