Երևանի Հյուսիսային պողոտայի հյուսիսային «դարպասի» մոտ իր դռները բացեց առաջին առևտրական հաստատությունը:

Մի քանի շաբաթ առաջ կառուցապատման նախագծի խարիսխը հանդիսացող հինգ հարկանի շինությունում տեղի ունեցավ «Հին Էրիվան» ռեստորանի բացման շնորհանդեսը:

Հյուսիսային պողոտան, ի վերջո, վերածվելու է Հանրապետության հրապարակը Օպերայի հրապարակին միացնող հետիոտնային զբոսուղի՝ իրականացնելով մոտ 80 տարի առաջ քաղաքի նախագծի հեղինակ ճարտարապետ Ալեքսանդր Թամանյանի տեսլականը:

Ռեստորանային համալիրը ներկայումս բացվել է Թումանյան փողոցին նայող երեք մակարդակների վրա: Տարբեր ճաշասրահները կոչված են Երևանի պատմության տարբեր շրջանների անուններով՝ «Էրեբունի-Երևան», «Հին Էրիվան» և «Նոր Երևան», և միասին կարող են ընդունել շուրջ 300 այցելուների: Վերջին հարկում մոտ մեկ ամիսից կբացվի «Երևանի լույսեր» սրահը:

Համալիրի տնօրեն Մանվել Տեր-Առաքելյանը լավատեսորեն է տրամադրված և կարծում է, որ նոր համալիրը (որը գտնվում է նոր պողոտայի կառուցման նպատակով քանդված տների տեղում) կդառնա տեղաբնակների և զբոսաշրջիկների սիրած վայրը:

«Մեր առաջին այցելուներից մեկը նախագահ Քոչարյանն էր, - ասում է Տեր-Առաքելյանը, - Եվ իմ կարծիքով, դա ռեստորանի որակի և սպասարկման լավագույն ցուցանիշն է»:

Տեր-Առաքելյանը հրաժարվեց նշել, թե որքան միջոցներ է ներդրել համալիրի շինարարության մեջ:

Հյուսիսային պողոտան քաղաքապետարանի նախաձեռնությունն է, սակայն ֆինանսավորվում է մասնավոր ներդրումների հաշվին: Հայտնի է, որ հիմնական ներդրողներից մեկը ռոսաստանցի մի հայ է, որը գնել է լավագույն տարածքը, որտեղ և բացվել է ռեստորանը:

Գործարարները յուրաքանչյուր քառակուսի մետրի համար վճարել են 350-ից 600 դոլար: Տարածքի կեսից ավելին՝ Արամի փողոցից մինչև Թումանյան փողոց, արդեն վաճառվել է:

Հյուսիսային պողոտայի շինարարությունը՝ որն իրականացվում է քաղաքապետարանի նախաձեռնությամբ և քաղաքի գլխավոր ճարտարապետ Նարեկ Սարգսյանի ղեկավարությամբ, սկսվել է 2001 թվականի վերջին: Պողոտայի ընդհանուր տարածքը 50 հազար քառակուսի մետր է, և ակնկալվում է, որ կառուցապատումը կավարտվի ոչ շուտ, քան 2010 թվականին:

Ծրագրի գլխավոր ինժեներ և ճարտարապետ Աշոտ Ալեքսանյանն ասում է, որ աշխատանքները, ընդհանուր առմամբ, լավ են ընթանում, և որ խնդիրների մեծ մասը կապված են ներդրողների հետ:

«Կառավարությունն ի վիճակի չէր նման մեծ ներդրում անել, կառուցապատել պողոտան և հետո վաճառել, - ասում է Ալեքսանյանը, - Մենք տարբեր խնդիրներ ենք ունենում, միգուցե, որովհետև սովոր չենք գործ ունենալ ներդրողների հետ: Նրանց մի մասն ուզում է մի տեսակի նախագիծ անել, մյուսները կարող են ուզենալ 10-հարկանի շենք կառուցել: Բայց մենք միշտ ձգտում ենք փոխզիջման հասնել»:

Խնդիրներից մեկը ջրմուղ-կոյուղու, օդափոխության և ջեռուցման միասնական ստորգետնյա համակարգի կառուցումն է: Ալեքսանյանի հավաստմամբ, ներդրողներն ակնկալում են, որ կառավարությունը կֆինանսավորի այդ աշխատանքները, ինչպես նաև կապահովի հաղորդակցման համակարգերը:

Սակայն նման ծառայությունները կբարձրացնեն մեկ քառակուսի մետրի վաճառքի գինը մինչև 1000 դոլար:

Ալեքսանյանի հավաստմամբ, շենքերի ներքին ձևավորումը թողնվում է ներդրողների հայեցողությանը, սակայն շենքի նախագիծը պետք է համապատասխանի գլխավոր հատակագծին, որը մասնավորապես նախատեսում է, որ Հյուսիսային պողոտայի շենքերը պետք է վեց հարկից բարձր չլինեն: Արտաքին ձևավորումը պետք է բավարարի նաև գունային պահանջներին՝ սպիտակ, վարդագույն և ծիրանագույն տուֆ և բաց երանգների գրանիտ:

Ավարտված վիճակում Հյուսիսային պողոտան կունենա 27 մետր լայնություն և 450 մետր երկարություն՝ երկու մայթերին տեղադրված ռեստորաններով, խանութներով, բնակելի շենքերով և գրասենյակներով:

Հյուսիսային պողոտան հատելու են ութ փողոցներ, սակայն երթևեկություն իրականցվելու է միայն Աբովյանը հատող Պուշկինի փողոցով:

Կառուցվելու է 800 մեքենաների համար նախատեսված երկհարկանի ստորգետնյա ավտոկայանատեղ:

«Հյուսիսային պողոտան ներդաշնակորեն կմիաձուլվի Երևանի ճարտարապետությանը, - ասում է Ալեքսանյանը, - Այն կհամադրի ճարտարապետության ժամանակակից և ավանդական տարրերը և թարմ տեսք կտա Երևանի կենտրոնին»: