Արևմուտքի որոշ միտումներ և երևույթներ Հայաստան ավելի արագ են թափանցում, քան մյուսները: Սակայն դրանք, ի վերջո, հասնում են այստեղ, և դրա ապացույցներից մեկն էլ այն հեռուստագովազդն է, որ վերջերս սկսել է եթերարձակել «Շանթ» հեռուստակայանը:

Գովազդում հնչում է «Ո՞վ է ցանկանում դառնալ միլիոնատեր» արտահայտությունը՝ արձագանքելով թերևս հռետորական այդ հարցին, որին 1998 թվականից սկսած պատասխանել են 101 երկրներում: Այժմ՝ նաև Հայաստանում:

«Զանգահարեք 0-90-11-11 հեռախոսահամարով, եթե ցանկանում եք շահել միլիոն», - սադրում է գովազդը:

«Շանթը», որը Հայաստանի ամենաշատ հանդիսատես ունեցող ալիքներից է, ձեռք է բերել կատաղի հաջողություն վայելող բրիտանական հեռուստախաղի հեռարձակման իրավունքը և պատրաստվում է սկսել տեղական տարբերակն արձագանքների թիվը ճշտելուց հետո:

«Ո՞վ է ցանկանում դառնալ միլիոնատեր» խաղն արդեն դարձել է Ռուսաստանի, Ուկրաինայի, Վրաստանի և Ադրբեջանի հեռուստամշակույթի մի մասը:

Հայաստանում հեռուստախաղի պրոդյուսեր Արտաշես Փարսադանյանը կարծում է, որ հայ հասարակությունը ոչ միայն պատրաստ է այս խաղին, այլև բավականին վաղուց սպասում է դրան:

«Խաղը չի ձախողվել 101 երկրներից և ոչ մեկում: Ամենուր այն վայելում է մեծ ժողովրդականություն: Չեմ կարծում, որ մեր երկիրը կտարբերվի մյուսներից», - ասում է Փարսադանյանը:

Ժողովրդականությամբ գուցե և չտարբերվի, սակայն մասնակիցներին տրվող հարցերով կտարբերվի:

Բարդ հարցերն այնպես են կառուցվելու, որ ստուգեն մասնակիցների Հայաստանին առնչվող գիտելիքները: Հատուկ հարցերի խմբագիր է նշանակվել Աշոտ Գոմցյանը, որը նման ծրագրերի մասնակցության փորձ ունի: Նա պետք է նախապատրաստի հայ հանդիսատեսին համապատասխանող հարցեր:

Հեռուստախաղի սկիզբը դրվել է Մեծ Բրիտանիայում հինգ տարի առաջ, որտեղ այն մեծ հաջողության է հասել: Մասնակիցներին հնարավորություն է տրվում շահել մեկ միլիոն ֆունտ ստերլինգ: Երբ այն կտրեց օվկիանոսը և հասավ Ամերիկա, գումարը վերածվեց մեկ միլիոն ԱՄՆ դոլարի: Հայաստանում շահումը կկազմի հինգ միլիոն դրամ:

«Խաղն ինքը շատ բազմակողմանի է, և մեր նպատակն է ծանոթացնել հայ հեռուստադիտողին միջազգային հեռուստաշոուի չափանիշներին», - ասում է Փարսադանյանը:

Խաղին մասնակցել ցանկացողները զանգահարում են գովազդվող հեռախոսահամարով և թողնում անձնական տվյալները: Համակարգիչը պատահականորեն ընտրում է պոտենցիալ մասնակիցների որոշակի քանակ: Մասնակիցների վերջնական ընտրությունը կատարելու են «Շանթի» աշխատակիցները, որոնք շաբաթը երկու անգամ եթերարձակվող հաղորդման համար ընտրելու են 8 մասնակիցների:

Համաձային խաղի բրիտանական սեփականատիրոջ հետ «Շանթի» կնքած պայմանագրի, Բրիտանիայում և այլ երկրներում կիրառվող խաղի ֆորմատը կպահպանվի: Կպահպանվեն նաև ձայնային և լուսային Էֆեկտները, որոնք ընդգծում են այն լարվածությունը, որն ուղեկցում է մեծ մրցանակը շահելու ձգտմանը:

Խաղավարի դերում ընտրվել է դերասան Աշոտ Ադամյանը:

37-ամյա Հասմիկ Մարտիրոսյանը Երևանից ասում է, որ դիտել է «Ո՞վ է ցանկանում դառնալ միլիոնատեր» հեռուստախաղը Ռուսական հանրային հեռուստատեսությամբ:

«Ես այս խաղի մոլի սիրահար եմ, - ասում է Մարտիրոսյանը, - Երբևէ չէի մտածում, որ այն կանցկացվի նաև Հայաստանում: Սա հնարավորություն է, որից անպայման պետք է օգտվել»: