Անցած հինգշաբթի օրը Երևանի «Ակադեմիա» պատկերասրահում կայացավ Զատկի թեմաներով ցուցահանդես-վաճառք, որտեղ իրենց ձեռքի աշխատանքներն էին ներկայացրել երկու տասնյակից ավելի ստեղծագործ կանայք:

Պատկերասրահում ներկայացված էին հին հայկական նախշերով գործվածքներ, գաթաներ, տիկնիկներ, թաշկինակներ, զարդարված ծառեր, վառ դեղին ճուտիկներ, մոմեր և նույնիսկ՝ գետնին ցիրուցան կաղամբ, բազուկ ու գազար:

«Սփյուռքում շատ ընդունված է Զատկի նախօրեին կազմակերպել նման միջոցառումներ, որտեղ հայ կանայք ցուցադրում են իրենց երևակայությունն ու հմտությունները, - ասում է ցուցահանդեսի կազմակերպիչ Սոնյա Թաշչյանը, - Հայաստանում արդեն երրորդ տարին է, ինչ նման միջոցառում է կազմակերպվում, և ամեն տարի ավելի աշխույժ ու գեղեցիկ մթնոլորտ է տիրում»:

Թաշչյանն ասում է, որ ցուցահանդեսի գլխավոր նպատակն է քաջալերել Զատկի խանդավառ տոնակատարությունը: Իսկ դրա համար, ըստ նրա, պարտադիր չէ պրոֆեսիոնալ արվեստագետ լինել: Ցուցադրվող աշխատանքների հեղինակներն էին տնային տնտեսուհիներ, ուսուցչուհիներ, տիկնիկագործներ, երիտասարդ աղջիկներ և նույնիսկ բանկի մի աշխատակցուհի:

«Ի տարբերություն անցյալ տարիների, այս տարվա ցուցահանդեսը նշանավորվում է նաև նրանով, որ ցուցահանդես-վաճառքին մասնակցել են 4 բարեգործական կազմակերպություններ՝ Աբովյանի «ՍՕՍ» մանկատուն-գյուղը, Վարդաշենի հատուկ կրթհամալիրը, «Ֆեմիլի քեյր» (օգնություն ընտանիքներին) կազմակերպությունը Սպիտակից և «ԷմԷսԷֆ»-ը Սևանից, - ասում է Թաշչյանը, - Այդ համադրությունն էլ ավելի է հարստացրել մեր տոնը»:

Սպիտակի «Ֆեմիլի քեյր» ակումբի «Վերածնունդ» արվեստի դպրոցի սաներն աշխատանքներ են պատրաստել ցուցահանդես-վաճառքի համար՝ հուսալով վաճառել դրանք և ստացված գումարներն օգտագործել դպրոցի կարիքները հոգալու համար:

«Ֆեմիլի քեյր» ակումբի կամավոր Քարին Խաչատուրյանն ասում է, որ այդպիսի միջոցառումների «շնորիվ պաշտպանվում ու պահպանվում է ժողովրդական արվեստը»:

Նրա սաները ցուցադրեցին հին հայկական փայտե գաթանախշեր, գդլամաններ, ձվեր և այլ աշխատանքներ:

Ուռենու ճյուղերից պատրաստված զամբյուղների, չորացրած ծաղիկների, ներկած ձվերի և գինու յուրահատուկ կոմպոզիցաների հեղինակ Էջմիածնի բնակչուհի, տնային տնտեսուհի Սրբուհի Շահնազարյանի կարծիքով, ցուցահանդեսը հայ կնոջ համար ուղեցույցի նման մի բան է:

«Շատ այցելուներ գալիս և ուշադրությամբ դիտում են, մի նոր բան են սովորում ու հարստացած դուրս են գալիս, - ասում է Շահնազարյանը, - Իսկ մասնակիցներից շատերի համար այս միջոցառումն ինքնահաստատվելու և առաջ շարժվելու խթան է հանդիսանում»:

Պարսկաստանից չորս տարի առաջ Հայաստան ներգաղթած Արմինե Ղազարյանն ասում է, որ Զատիկն իր համար ամենագունագեղ և պայծառ տոնն է: Նա ասում է, որ ցուցահանդեսում ցուցադրվող աշխատանքերն էլ ավելի պայծառ են դարձնում տարվա այս եղանակը:

Էդնա Մասիհը զատկաբլիթ թխելու վարպետ է, և որպես լավ վարպետ՝ չի բացահայտում իր գաղտնիքը, սակայն ասում է, որ դա ցանկություն ու համբերություն է պահանջում:

«Այս միջոցառումը ցույց է տալիս Զատկի գալուստը, - հավաստում է նա, - Սա բոլորիս համար գարնան գալստյան պես մի իրողություն է»: