Ֆուտբոլ (Տարվա լավագույն ֆուտբոլիստը)

Տարվա լավագույն ֆուտբոլիստ է ճանաչվել Հայաստանի չեմպիոն «Փյունիկի» ռմբարկու Արման Քարամյանը:

Այս խաղաշրջանի 22 խաղերում նա խփել է 36 գոլ:

Քսաներեքամյա հարձակվողն առաջին անգամ է արժանանում այդ կոչմանը, որն ամեն խաղաշրջանում շնորհում են Հայաստանի ֆուտբոլի ֆեդերացիան և «Ֆուտբոլ պլյուս» տեղական շաբաթաթերթը:

Շախմատ (ՖԻԴԵ-ի գործակիցների աղյուսակ)

Սլովենիայի Բլեդ քաղաքում կայացած Շախմատի 35-րդ օլիմպիադայում Հայաստանի տղամարդկանց և կանանց թիմերի հաջող ելույթներից հետո հայ շախմատիստների գործակիցները փոփոխվել են:

Համաձայն ՖԻԴԵ-ի (Շախմատի միջազգային ֆեդերացիա) գործակիցների աղյուսակի, դեկտեմբերի դրությամբ աշխարհի 100 լավագույն շախմատիստների թվում Հայաստանից ընդգրկված են երեք տղամարդ և երկու կին շախմատիստներ:

Լավագույն հայ շախմատիստը շարունակում է մնալ Վլադիմիր Հակոբյանը, որը 2678 միավորով զբաղեցնում է 20-րդ հորիզոնականը:

Ռաֆայել Վահանյանն աշխարհում 28-րդն է՝ 2664 միավորով, իսկ Սմբատ Լպուտյանը 56-րդն է՝ 2634 միավորով:

Լավագույն հայ կին շախմատիստն Էլինա Դանիելյանն է, որը 2411 միավորով զբաղեցնում է 40-րդ տեղը: Նրան հաջորդում է 49-րդ տեղը զբաղեցնող Լիլիթ Մկրտչյանը: