Արդեն ութ ամիս է անցել, ինչ սափրագլուխների (սքինհեդներ) դեմ մեղադրանք է հարուցվել Ռուսաստանի Կրասնոդար քաղաքում հայկական գերեզմանները պղծելու մեջ, իսկ դատավարությունը շարունակվում է ձգձգվել:

Ռուսաստանի ավելի քան 20 քաղաքացիների մեղադրանք է ներկայացվել անցյալ տարվա ապրիլի 17-ին Սլավյանսկոյե գերեզմանոցում հայկական 31 գերեզմաններ ավերելու մեջ: Առ այսօր մեղադրյալներից ինը ներկայացել են Կուբանի դատարան՝ օգոստոս ամսին սկսված դատական նիստերին:

«Երկրամաս» հայկական թերթը նշում է, որ տարածքից չբացակայելու մասին ստորագրություն տալուց հետո մեղադրյալներից յոթն ազատ են արձակվել: Մյուս երկուսը գտնվում են կալանքի տակ:

Թերթը նաև նշում է, որ սկզբում ամբաստանյալները խոստովանել են իրենց մեղքը, իսկ հետո հրաժարվել են՝ ասելով, որ ոստիկանությունն է ստիպել իրենց մեղսակցությունը հաստատող ցուցմունքներ տալ:

Դատական լսումներն առաջին անգամ հետաձգվել են, որպեսզի ամբաստանյալներից մեկը ենթարկվի բժշկական հետազոտության: Երկրորդ անգամ նիստը հետաձգվել է ամբաստանյալներից մեկի դատարան չներկայանալու պատճառով:

Ռուսաստանի հայերի միության կրասնոդարյան մասնաճյուղի անդամ Արմեն Հովսեփյանն ասում է, որ հետաձգումները հարուցում են Կրասնոդարի հայերի կասկածը՝ դատավարության օրինական ավարտի վերաբերյալ:

«Դատավարությունը շարունակվում է ավելի քան ութ ամիս, թեև բոլոր հանցանշաններն ակնհայտ են, - ասում է Հովսեփյանը, - Ժամանակն է կայացնել դատավճիռը: Վախենամ, որ անպատժելիությունը տարածաշրջանում կովկասցիների դեմ ուղղված նոր կրքեր կբորբոքի»:

Կրասնոդարի շուրջ 500000-անոց հայկական համայնքում այն կարծիքին են, որ խուլիգաններին հրահրել է ապրիլի սկզբին նահանգապետի տեղական հեռուստատեսությամբ արված այն հայտարարությունը, որ Կրասնոդարը պետք է մաքրվի կովկասցիներից:

Հայերը մեղադրում են Ալեքսանդր Տկաչովին հակահայկական քաղաքականություն վարելու մեջ, որը, ըստ նրանց, վերջինս ժառանգել է նախկին նահանգապետ Նիկոլայ Կոնդրատենկոյից:

Նոյեմբերի 16-ին Կրասնոդարի նախկին նահանգապետ Կոնդրատենկոն իր ելույթում նշել է, որ Ադլերում (Կրասնոդարի երկրամասի ծովափնյա քաղաքներից մեկը) դպրոցականների ավելի քան 50 տոկոսը հայեր են: «Մենք՝ ռուսներս, կորցնում ենք Ռուսաստանը», - ասել է նա:

Հովսեփյանն ասում է, որ ներգաղթի նկատմամբ վերահսկողությունը խստացել է այն բանից հետո, երբ նոյեմբերին չեչեն ահաբեկիչները պատանդներ էին վերցրել Մոսկվայի թատրոններից մեկում, որի արդյունքում զոհվեցին մոտ 200 հոգի:

«Ստուգումներն ամենուր են, - ասում է Հովսեփյանը, - Ոստիկանությունը մարդկանց կանգնեցնում է փողոցում միայն այն բանի համար, որ նրանք ռուս չեն»:

Բնիկ կրասնոդարցի Հովսեփյանն ասում է, որ բոլոր հայերն անձնագրերը միշտ իրենց հետ են կրում: Միաժամանակ նա նշում է, որ Կրասնոդարում իրոք առկա է անօրինական ներգաղթի մեծ հոսք: «Իրավիճակը կայուն է, այնուհանդերձ հայերը՝ և՛ քաղաքացիները, և՛ անօրինական ներգաղթածները, զգում են լարվածությունը տրանսպորտում, հաստատություններում և փողոցում»:

Հակահայկական գործողությունների հետ առնչվող մեկ այլ դատական գործի լսումները կայացան Ռուսաստանի Կրասնոարմեյսկ քաղաքում, որի 35000 բնակիչներից 150-ը հայեր են:

Այնտեղ (Մոսկվայից 50 կիլոմետր դեպի հյուսիս) հուլիսի 7-ին ձերբակալվել էին 20 ռուսներ՝ 25 հայերի ծեծելու և վնասվածքներ հասցնելու համար: Միջադեպի պատճառ էր հանդիսացել մի ռուսի և մի հայի միջև բռնկված կռիվը, որի ժամանակ հայը դանակահարել էր ռուսին, և վերջինս մի քանի շաբաթ անց էր կացրել հիվանդանոցում:

Մոսկվայում Հայաստանի դեսպանության երկրորդ քարտուղար Մարիաննա Բաբայանը տեղեկացրեց «ԱրմենիաՆաուին», որ հայ համայնքը հետևել է դատավարությանը, և ասում է, որ այն արդար է եղել:

«Դատարանը վճիռ է կայացրել, որ դա ներքին կոնֆլիկտ է եղել հայերի և ռուսների միջև: Մեղադրյալներին ազատ են արձակել՝ քաղաքից չբացակայելու պայմանով»:

«Մենք պետք է ընդունենք, որ բախումը հրահրել է (դանակահարության մեջ մեղադրվող) Հայկ Սայանը: Ներկայումս նա գտնվում է բանտում:

«Վերջերս դեսպանության պատվիրակությունը մեկնել էր Կրասնոարմեյսկ: Իրավիճակն այնտեղ կայուն և խաղաղ է: Կրասնոարմեյսկի հայերը կարող են զանգահարել մեզ ցանկացած ժամանակ, եթե որևէ պատահար լինի: Սեպտեմբերին մենք հրավիրել էինք Կրասնոարմեյսկի քաղաքապետին՝ տոնելու Հայաստանի անկախությունը: Կարող եմ ասել, որ Մոսկվայում հայերը ճնշված չեն: Համենայն դեպս, նրանք, ովքեր քաղաքացիություն կամ ժամանակավոր գրանցում ունեն»: