Թենիս (ՊԹԱ առաջնություն)

Պրոֆեսիոնալ թենիսիստների ասոցիացիան ավարտեց իր մրցաշրջանը հայ թենիսիստների հետևյալ արդյունքերով.

Երևանցի թենիսիստ Սարգիս Սարգսյանն ավարտեց մրցաշրջանը 85-րդ տեղում՝ վաստակելով 70 միավոր: Սարգսյանը խաղացել է 19 մրցաշարում (14-ը՝ Ինթերնեշնլ սերիզ մրցաշարում), այդ թվում՝ Մեծ սաղավարտի բոլոր չորս մրցաշարերում (Ավստրալիայի բաց առաջնություն, Ֆրանսիայի բաց առաջնություն, Ուիմբլդոն, ԱՄՆ բաց առաջնություն):

Հաղթելով 13 խաղում և կրելով 19 պարտություն՝ Սարգսյանը վաստակել է մոտ 200000 դոլար:

Արգենտինահայ Դավիթ Նալբանդյանն ավարտեց մրցաշրջանը 12-րդ տեղում՝ վաստակելով 355 միավոր: Նա խաղացել է 18 մրցաշարում և հաղթել է Բազելի (Շվեյցարիա) և Էստորիլի (Պորտուգալիա) մրցաշարերում: Սակայն տարվա նրա մեծագույն նվաճումն Ուիմբլդոնի եզրափակիչ հասնելն էր (որտեղ նա տանուլ տվեց աշխարհի համար 1 թենիսիստ Լեյթոն Հյուիթին):

Նալբանդյանը վաստակել է մոտ 900000 դոլար:

Թենիս (Կին թենիսիստների ասոցիացիա)

Շվեյցարահայ թենիսիստուհի Մարի-Գայանե Միքայելյանն ավարտեց մրցաշրջանը ԿԹԱ-ի 44-րդ տեղում: Այս տարի նա առաջին անգամ մասնակցեց Մեծ սաղավարտի բոլոր չորս մրցաշարերին:

Սամբո (Աշխարհի առաջնություն)

Պանամայի մայրաքաղաք Պանամա Սիթիում դեկտեմբերի 2-ին ավարտված Սամբոյի աշխարհի առաջնությունում Հայաստանը ներկայացնող վանաձորցի Արթուր Գրիգորյանը 57 կգ քաշային կարգում գրավեց երկրորդ տեղը:

Մյուս երկու հայ սամբիստները՝ Վանիկ Խոջոյանը (62 կգ) և Շողիկ Գևորգյանը (48 կգ) պարտվեցին առաջին փուլում: