Այս
սեղանն այնքան լիքն է, որ հյուրերը ստիպված են հետ
քաշվել, որպեսզի սեղանի վրա էլի ուտեստներ դնեն:
Իսկ ուտելիք էլի է գալիս, կարծես Արարատի սառցե
գագաթն ուտեստների մի բլուր է, որ սկսել է հոսել
գարնանային հալոցքից, և դրա վերջնակետը Հալաբյան
փողոցի վրա գտնվող այս բնակարանն է:
Սեղանի մի ծայրին ես եմ, մյուսին՝ Արթուրն ու
Յուլիան, և մեր միջև ուտեստների մի ամբողջ պատկերասրահ
է, որը սկսվում է թթու վարունգով, պանրով, ձիթապտղով
և վերջանում է չորս տարբեր աղցաններով: Պնակների
մեջ շարված պանիրն ընդմիջվում է մսի շերտերով, որոնց
մեջ ձիթապտուղ է դրված: Դա արված է հմտորեն՝ արտիստիկ
խոհանոցային մի խճանկար ստեղծելու նպատակով, որը
վարանում է խախտել անգամ քաղցած մարդը: Աղցանները
պսակվում են խաշած ձվի կիսված սպիտակուցներով՝ դրանց
վրա ատամմաքրիչներով ամրացված պանրի շերտերը հիշեցնում
են փոքրիկ «առագաստներ», և թվում է, թե կտրտած կաղամբի
և գազարի օվկիանոսում ձվի նավակներ են լողում: Ձվաձև
պնակներում դարսված կանաչուն խնամքով թռչնաբույնի
տեսք են տվել, որի գագաթին տեղադրված է գազարե մի
ծաղիկ՝ ձիթապտղե վարսանդով:
Սեղանի ծայրերին բազմազան խմիչքներ են՝ կոկա-կոլա,
ֆանտա, ջերմուկ, գինի, օղի, հյութ...
Սեղանի շուրջը նստած ենք 15 հոգով (քաղաքակիրթ
երկրներում այդ սեղանի շուրջը կնստեր ութ հոգի):
Արմունկների տեղ հայկական սեղանների շուրջ չեն նախատեսում,
և ինձ մոտ այնպիսի տպավորություն է ստեղծվել, որ
սեղանների շուրջ հնարավորին չափ շատ հյուրեր են
նստեցնում, որպեսզի նրանց հնարավորություն տան վայելել
իրար գլխի վրայով ուտելիքներին հասնելու հաճույքը:
Սակայն առաջինը հյուրերին սեղանի շուրջը նստեցնելու
արարողությունն է: Ես ականատես եմ եղել, թե ինչպես
է դա տևել գրեթե կես ժամ, նույնիսկ փոքրաթիվ հյուրերի
պարագայում:
«Նստեք, նստեք»:
«Չէ, չէ, դուք նստեք»:
«Չէ, դուք»:
«Չէ, դուք»:
... Եվ այդպես շարունակ՝ բարեկրթության մի տեսակ
մրցույթ, որպեսզի հետո նստեն և խախտեն ճաշելու էթիկետի
կանոնների մեծ մասը: Հայերն ուտելը վերածում են
սպորտի, դիմացկունության փորձության, որին մասնակցում
են ուրախությամբ:
Սեղանի շուրջը նստած հյուրերի տաբատների և փեշերի
վրայի ծալքերը դեռ չեն հասցնում մի կարգին ձևավորվել,
երբ տեսարանը կենդանանում է դեմքերի առջևով աշխուժորեն
երթևեկող արմունկներով և արշավի ելած դատարկ և ավարով
վերադարձող, կաթացող գդալ-պատառաքաղներով:
Իմ քիթը ձևափոխությունից միայն կշահեր, սակայն
տակավին ոչ այն մեթոդներով, որոնք սպառում են ինձ
ամեն անգամ, երբ ես նստում եմ նման սեղանների շուրջը:
Պատառաքաղները ճախրելով անցնում են ռունգերիդ կողքով
ու հետո վերադառնում են՝ շալակած մի կես խոզի բուդ,
մի ամբողջ կարտոլ կամ մի գլուխ պանիր:
Ավելացրեք Սփյուռքը, և դուք կունենաք մի մշակույթ՝
առնվազն երկու լեզուներով, որոնցից ոչ մեկում «փոխանցեք,
խնդրեմ» արտահայտությունն առանձնապես ընդունված
չէ:
Եվ չկա ավելի զվարճալի և համեղ տեղ, քան Հալաբյան
փողոցի այն բնակարանը, ուր գնացել էի կիրակի օրը,
կամ տասնյակ այլ տները, որտեղ պատիվ եմ ունեցել
ակտիվորեն մասնակցելու նման տեսարանների:
Այդ օրը ես նայում եմ ինձ շրջապատող երիտասարդ
դեմքերին: Նրանք հետնորդներն են այն սերնդի, որն
իմ ծնողներին հայտնի էր որպես «սովամահ լինող հայեր»:
Դա մի պատկեր է, որը դժվար է վերականգնել հիշողության
մեջ այս սեղանի շուրջը:
Մենք հավաքվել ենք, որպեսզի նշենք Հայկի ծննդյան
օրը և նրա ու Տաթևիկի ամուսնության երկրորդ տարեդարձը:
Հյուրերը Հայկի նախկին բանակային ընկերներն են,
որոնց հետ ծառայել է Ղարաբաղում: Եվ այս դեմքերն
ինձ էլ են մոտ դարձել այս հինգ տարիների ընթացքում:
Կարեն, Վալերի, Եղիշե, Հովիկ, Մայիս և Արթուր:
Նրանց մեծ մասին առաջին անգամ տեսել եմ զինվորական
համազգեստով: Այսօր ես տեսնում եմ նրանց իրենց կանանց
կողքին և ծանոթանում եմ վերջին երկու տարում այս
մեծ ընտանիքին ավելացած երեք երեխաների հետ:
Ես ամառային գիշերներ եմ անցկացրել Ղարաբաղում
նրանց հետ՝ կռվելով մոծակների դեմ և ամուրիական
ճաշեր ուտելով: Այսօրվա օրը բոլորովին ուրիշ է:
Նրանք այսօր ունեն եթե ոչ կարիերա, ապա գոնե աշխատանք,
և այսօր խմեցին նաև այն բախտավորության կենացը,
որ այս զույգերից երկուսն ունեն իրենց սեփական բնակարանները:
Այս մարդիկ հարուստ չեն, ոչ էլ առանձնապես տարբերվում
են ժողովրդի մեծամասնությունից: Նրանք օգտվում են
երթուղային տաքսիներից կամ համեստ մեքենաներ ունեն,
և եթե նրանց սեղանները միշտ այսպես լիքը չեն, ապա
նրանք գոնե հնարավորություն ունեն նման սեղաններ
գցել այսօրվա նման առիթներով:
Ինձ հաճախ են հարցնում, արդյոք Հայաստանում վիճակը
բարելավվում է: Այս տանն այս օրով ամեն ինչ հիանալի
է:
|