ArmeniaNow.com - Independent Journalism From Today's Armenia
 Back to current issue 
 Back to archive 
 January 17, 2003 
HOME ABOUT US NEWS FEATURES ARTS SPORTS OUTSIDE EYE ARCHIVE STAFF CONTACTS



Ժամանակից առաջ. առաջնակարգ ժամագործը որպես տարածաշրջանային կենտրոն ընտրում է Երևանը


Թանկարժեք ժամացույցների արտադրության ասպարեզում առաջատար ընկերություններից մեկը տարածաշրջանային իր վերջին բուտիկը բացելու համար ընտրել է Աբովյան փողոցը Երևանում:

Անցյալ ամիս Շառլ Ազնավուրի հրապարակում՝ նախկին «Մոսկվա» ռեստորանի տեղում, բացվեց շվեյցարական «Ֆրանկ Մյուլլեր» ընկերության խանութը:

Կարող է թվալ, որ այսպիսի խոշոր ընկերության համար, որի թանկարժեք ժամացույցներից մեկը գնելու համար պահանջվում է այս երկրի բնակչի մի քանի տարվա պաշտոնական միջին եկամուտը, նման նախաձեռնությունը կապված է մեծ ռիսկի հետ:

«Սկզբում ենթադրում էինք, որ առևտրական խաչմերուկ լինելով Իրանի, Թուրքիայի և Ռուսաստանի միջև՝ Հայաստանը մեզ համար լայն շուկա կապահովի, - ասաց նոր խանութի բացման կապակցությամբ Հայաստան ժամանած պարոն Մյուլլերը, - Սակայն չորսամյա ընդմիջումից հետո վերադառնալով Հայաստան՝ կարծում եմ, որ երկրի տնտեսության աճի շնորհիվ շատ գնորդներ կունենանք նաև այստեղ»:

Հայաստանյան հաճախորդի ուշադրությանն է ներկայացված ընկերության արտադրած ժամացույցների և ոսկերչական իրերի լայն ընտրանի, որի գները սկսվում են 6000 շվեյցարական ֆրանկից (մոտ 4000 դոլար կամ 2340000 դրամ):

Անցյալ գարնանը, երբ Երևանում իր խանութը բացեց «Սվոչ» շվեյցարական ընկերությունը՝ ներկայացնելով իր նորագույն ոճի և միջին գների ժամացույցները, ոմանք ասում էին, որ նույնիսկ այդ մատչելի գներ ունեցող տեսականին դժվարությամբ կգտնի իր հաճախորդին: Դե իսկ «Մյուլլերի» գներն ունեցող որևէ ընկերություն երբևէ չէր փորձել գործ սկսել Հայաստանում:

Թեև հաճախորդների համար այն առայժմ ծառայում է հիմնականում որպես ցուցասրահ, հիմնադիրները չեն թաքցնում, որ իրենց սպասելիքներն արդեն արդարացվել են, քանի որ պարզապես դիտողների հետ միասին բավական թվով գնորդներ են ունեցել տեղի բնակիչներից:

«Խանութի բացման հաջորդ օրվանից նրանք, ովքեր գնահատում են այսպիսի իրերը և հնարավորություն ունեն, այստեղ էին», - ասում է Հայաստանում «Ֆրանկ Մյուլլեր» խանութի հիմնադիր գործարար Արմեն Հայրապետյանը:

Սակայն Հայրապետյանն ասում է, որ առաջնային նպատակն այն էր, որ ընկերությանը ներկայացնելու իրավունքը տրվի Հայաստանին, «և ոչ թե հարևան առավել մեծ պետություններին»:

Նրա խոսքերով, խանութը դեռ չբացված՝ այս բիզնեսով զբաղվող տարբեր իրանական և վրացական ընկերություններ համագործակցելու հետաքրքրություն են ցուցաբերել:

«Նման խանութի և գեղեցիկ ժամացույցների ու ոսկերչական իրերի առկայությունը խթան կհանդիսանա հայերի էսթետիկական ճաշակի զարգացման համար, - ասում է Հայրապետյանը, - Իմ կարծիքով, Հայաստանում տնտեսությունը զարգանում է , որը նշանակում է, որ մարդիկ փող են վաստակում, և պետք է հնարավորություն տալ ծախսել այդ գումարները գեղեցիկ բաների վրա: Հայաստանում մարդկանց հնարավորություններն աստիճանաբար աճում են, և անորակ ապրանքներ գնելու միտումը նվազում է: Արդեն ուշադրություն են դարձնում գեղեցիկ և որակյալ ապրանքներին»:

Հայրապետյանը Հայաստան է վերադարձել 1995 թվականին՝ յոթ տարի Ռուսաստանում աշխատելուց հետո: Այսօր նա Հայաստանում այնպիսի ընկերությունների բացառիկ դիտրիբյուտորն է, ինչպիսիք են «Սամսունգը», «Ժիլետ գրուփը» և «Նայքին»:

«Այսօր մեր երկրի կայուն տնտեսական վիճակը թույլ է տալիս մեզ՝ գործարարներիս, համագործակցել այնպիսի խոշոր ընկերությունների հետ, ինչպիսին է «Ֆրանկ Մյուլլերը», - ասում է նա:

Բացի խանութ բացելուց, «Ֆրանկ Մյուլլերը» ավելի քան 2 միլիոն դոլար է ներդրել Հայաստանում ոսկերչության, կաշվի վերամշակման և գյուղատնտեսության բնագավառներում: Այսօր ընկերության ժամացույցների պողպատյա պարուտակներն արդեն արտադրվում են Հայաստանում, և այդ նպատակով ներմուծվել են նորագույն տեխնոլոգիաներով աշխատող ութ գերժամանակակաից հաստոցներ:

Ֆրանկ Մյուլլերը նաև «AWI» («Armenian Watch Incorporation» «Հայկական ժամագործական ինկորպորացիա») ընկերության հիմնադիրներից է, որը միայն ռուսական շուկայում տարեկան շուրջ 700000 ժամացույց է իրացնում:

Դեկտեմբերին Հայաստանը դարձել է Առևտրի համաշխարհային կազմակերպության անդամ՝ հնարավորություն տալով աշխարհի 145 երկրներ առաքել «Պատրաստված է Հայաստանում» պիտակը կրող ապրանքները:

«Շուտով նման մակարդակի ընկերությունները՝ մեկը մյուսին հետևելով, ցանկություն կհայտնեն նման կենտրոններ ունենալ Հայաստանում, ինչը դրականորեն կանդրադառնա մեր տնտեսության վրա», - ասում է Հայրապետյանը:

«Հեռու չէ այն օրը, երբ մենք Երևանում կունենանք այնպիսի փողոց, ինչպիսին է Պլասվանդոմը Փարիզում կամ Ջինզան Տոկիոյում»:


 

Voting Climate: Report say "extraordinary efforts required" to assure clean elections

Full story

 
 
 
 

Bound by Belief: Molokans hold on to faith and tradition in changed world

Full story

 
 
 
 

Politics: Ruling against Hovanissian renews debate about Kocharyan's citizenship

Full story

 


Write us at: info@armenianow.com





Copyright ArmeniaNow.com 2002-2017. All rights reserved.

The contents of this website cannot be copied, either wholly or partially, reproduced, transferred, loaded, published or distributed in any way without the prior written consent of ArmeniaNow.com.