Երբ ապրիլի 8-ին 60-ամյա Լյուդմիլա Միրզոյանը առավոտ կանուխ սովորականի նման դուրս եկավ այգում աշխատելու՝ շվարեց մնաց և չհավատաց աչքերին:

Ծիրանի, տանձի, բալի և սալորի ծաղկած ծառերը, առագաստների նման, հայտնվել էին անեզր ջրի մեջ:

Մի գիշերվա ընթացքում Արարատի մարզի Սիս գյուղը, հանրապետության ավելի քան 50 բնակավայրերի նման, իր վրա զգաց հեղեղների կործանարար ուժը:

«Արտակարգ իրավիճակը, որը ստեղծվել է հանրապետության ողջ տարածքում վերջին օրերի ընթացքում, լիովին կանխատեսելի էր, - ասում է Արտակարգ իրավիճակների վարչության լրատվության կենտրոնի պետ, գնդապետ Նիկոլայ Գրիգորյանը, - սակայն ոչ այս չափերով: Տուժել են Սյունիքի, Արարատի, Շիրակի, Տավուշի, Գեղարքունիքի, Վայոց ձորի, Լոռու և այլ մարզերի մի քանի տասնյակ բնակավայրեր»:

Մասնագետների հավաստմամբ, հեղեղումների պատճառն անսովոր բարձր ջերմաստիճանն է, որն արագացրել է հալոցքը, և հալած ձյան անսպասելի մեծ զանգվածները հեղեղել են Հայաստանի գետերն ու առուները:

«Ժամերի ընթացքում ես կորցրեցի իմ հույսը, իմ տարիների աշխատանքը՝ այգին ու բանջարանոցը, - ասում է Ադրբեջանից գաղթած Լյուդմիլան: - Նկուղը, որտեղ պահում էինք ալյուրը, շորերը, ցորենն ու այլ մթերքները, բերնեբերան ջրի մեջ էր, տան պատերն էլ են ճաքել ջրից, իսկ հողը, որ մենք տարիներ շարունակ մշակել էինք՝ հավասարվեց զրոյի»:

Ջրի մակարդակը նրա բանջարանոց-այգում բարձրացել է 1,5 մետրով և 9 օր մնացել է այդ կետի վրա: Լյուդմիլան ասում է, որ իրենք «կորցրել են ամեն ինչ»:

Լյուդմիլան հավաստում է, որ վնասը շատ մեծ է, քանի որ ինքն ամսական 6000 դրամ թոշակ է ստանում, և միայն այգին ու բանջարանոցն էին, որ օգնում էին մի կերպ գոյատևել:

67-ամյա Անիչկա Զախարյանը գաղթել է Բաքվից և ասում է, որ ինչպես ինքը, այնպես էլ իր հարևան գյուղացիներն ավելի դառն օրեր են ապրել, սակայն ավելացնում է. - «Թե ոնց ենք ապրելու այս ամենից հետո՝ աստված գիտի»:

Եվա Միրզոյանը ցույց է տալիս սենյակը, որտեղ ամեն ինչ կապած է հեռանալու համար:

«Մեր դիմացի տան բնակիչներին մի կերպ էվակուացրեցին, քանի որ տունն ամբողջությամբ ջրի մեջ էր հայտնվել, մի կերպ՝ աղյուսներ լցնելով, տախտակներ դնելով, - ասում է նա: - Ես էլ իրերը հավաքել դրել եմ, որ հենց ջուրը հասնի իմ սենյակ` հեշտ փախչեմ: Մնացել ենք անօգնական: Ոչ մեկը մինչ այսօր դեռ ոչ մի բանով մեզ օգնած չկա, մինչ այսօր նույնիսկ չեն եկել վնասի չափը գնահատելու»:

Սիսի գյուղապետ Եղիշե Լազգյանի հավաստմամբ կորուստները շատ մեծ են, հալոցքից Հրազդան գետը վարարել և հեղեղել է առնվազն 110 հա ցորենի և կարտոֆիլի դաշտերը:

«Գյուղացին այսօր մեծ կորուստներ է կրել, քանի որ յուրաքանչյուր հեկտարի վրա ծախսել է ամենաքիչը 300 դոլար գումար: Սիսը մի գիշերում կորցրել է իր բոլոր վարելահողերը, բերքն ու հույսը», - ասում է Լազգյանը:

Գյուղապետը հավաստում է, որ իրենք շտապ գրություն են ուղարկել կառավարություն՝ գյուղացիներին օգնելու խնդրանքով, սակայն առ այսօր մնացել են անարձագանք:

Գյուղացիներն ու գյուղապետը հավաստում են, որ ներկայումս մի հատուկ խումբ ամբողջ հանրապետությունով մեկ ճշտում է վնասի չափսերը:

«Մենք կարծում ենք, որ ինչ-որ օգնություն կլինի կառավարությունից, - ասում է գյուղապետը, - թեև չեմ հիշում նման մի դեպք, որ գյուղացին փոխհատուցում ստացած լինի»: